Մենենդեսը թվարկել է այն պայմանները, որոնց լուծման դեպքում միայն կհանի Թուրքիային F-16-երի վաճառքի իր առարկությունը

ԱՄՆ Սենատի արտաքին հարաբերությունների հանձնաժողովի նախագահ Ռոբերտ Մենենդեսը թվարկել է պայմանները, որոնց դեպքում նա կարող է հանել Թուրքիային F-16 կործանիչների վաճառքի վերաբերյալ իր առարկությունները, գրում է The Eurasian Times-ը։

Սենատորը  Հունական լրատվական գործակալության հետ զրույցում  հայտարարել է, որ ԱՄՆ-ն պետք է ռազմական տեխնիկա վաճառի այն երկրներին, որոնք կիսում են իր արժեքները, և ոչ միայ ֆինանսական շահի համար։ Նա թվարկել է մի շարք խնդիրներ, որոնց մասով Անկարան պետք  փոխի իր վերաբերմունքը։ Դրանց թվում են՝ ռուսական С-400 համակարգերի ձեռքբերումը, Հունաստանի կղզիների վրայով թռիչքները, Ռուսաստանի հետ Թուրքիայի սերտ հարաբերությունները, մարդու իրավունքների խախտումները, այդ թվում՝ լրագրողների և փաստաբանների բանտարկությունները։

Նա նաև հավելել է, որ չլուծված խնդիրների ցանկը երկար է, որոնք պետք է լուծվեն F-16 ինքնաթիռների ու արդիականացման սարքերի վաճառքին հասնելու համար, սակայն դեռ չի տեսել Թուրքիայի նախագահ Ռեջեփ Թայիփ Էրդողանի պատրաստկամությունը։

Մենենդեսն առանցքային անձ է, որի ձեռքում են « F-16 –ի բանալիները», քանի որ նա կարող է վաճառքի վրա վետո դնել որպես արտաքին հարաբերությունների հանձնաժողովի նախագահ։ Հավելենք, որ ԱՄՆ Ներկայացուցիչների պալատը նախօրեին  ընդունել էր 2023 թ.-ի Ազգային պաշտպանության վավերացման ակտ օրենքում  հայամետ չորս փոփոխությունները, որոնցից մեկն էլ վերաբերվում է F-16-ի վաճառքի սահմանափակումներին։

Էմմա Չոբանյան