19.08.2026 | 19:43
Արաղչին հայտարարել է, որ Իրանի պատերազմն ապացուցեց՝ արտաքին ուժերն ու բազաները չեն կարող անվտանգություն ապահովել
Տոկաևը Ղազախստան է կանչում Ռուսաստանից հեռացած արևմտյան ընկերություններին
Քաղաքականություն
14.07.2022 | 22:50
Ղազախստանի նախագահ Կասիմ-Ժոմարտ Տոկաևը կառավարությանը հանձնարարել է բարենպաստ պայմաններ ստեղծել Ռուսաստանից հեռացած օտարերկրյա ընկերությունների՝ իրենց երկիր տեղափոխման համար։ Այս մասին հինգշաբթի՝ հուլիսի 14-ին, հայտնել է Ղազախստանի ղեկավարի մամուլի ծառայությունը։
Տոկաևը նշել է, որ այժմ գլոբալ պայքար է ընթանում ներդրումային կապիտալի համար, մասնավորապես, մոտ 1,400 օտարերկրյա ընկերություններից գրեթե ամեն երկրորդը դադարեցրել է գործունեությունը կամ լքել ռուսական շուկան։
Կառավարությունը պետք է բարենպաստ պայմաններ ստեղծի նրանց Ղազախստան տեղափոխելու համար։ Դա մեզ լավ հնարավորություններ կտա ավելացնելու միջին և վերին վերամշակման ապրանքների արտադրությունը, ընդգծել է պետության ղեկավարը։
Տոկաևը հիշեցրել է, որ ինքը նաև հանձնարարել է մի շարք ներդրումային նախագծեր պատրաստել վերամշակող արդյունաբերության ոլորտում, սակայն մինչ այժմ «պարծենալու քիչ բան կա», իսկ նոր նախագծեր չկան։
Հիշեցնենք, որ փետրվարի վերջից՝ Ուկրաինայում ռազմական գործողությունների մեկնարկից հետո հարյուրավոր օտարերկրյա ընկերություններ հայտարարել են Ռուսաստանում գործունեությունը դադարեցնելու կամ սահմանափակելու մասին։
Տաթև Ֆռանգյան
