Տարոն Մարգարյանն ու Գևորգ Կոստանյանն ապօրինի գույքի բռնագանձման ծանուցագրեր են ստացել

ՀՀ նախկին գլխավոր դատախազ, ԱԺ նախկին պատգամավոր Գևորգ Կոստանյանին և Երևանի նախկին քաղաքապետ, ներկայում ԱԺ «Պատիվ ունեմ» խմբակցության պատգամավոր Տարոն Մարգարյանին ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունը ծանուցագրեր է ուղարկել։ Ըստ այդմ՝ նրանք ու փոխկապակցված անձինք պետք է համապատասխան մարմին ներկայանան հուլիսի 19-ին։ Այս մասին Factor.am-ին տեղեկացրեց ՀՀ գլխավոր դատախազի խորհրդական Գոռ Աբրահամյանը։

«Նրանք պետք է գան Դատախազություն և ծանոթանան իրենց վերաբերյալ կատարված ուսումնասիրության արդյունքներին, դիրքորոշում արտահայտեն՝ պայմանավորված այն հանգամանքով, որ ուսումնասիրությունն իրենց մասով արդեն ավարտվել է: Տվյալ դեպքում ուսումնասիրությունը այդքան առնչություն չունի հայտարարագրման պրոցեսի հետ, այսինքն` այն անկախ է իրականացվում՝ ըստ վարչության կողմից ձեռքբերված գույքի վերաբերյալ տվյալների, նաև հաշվի են առնվում հայտարարագրման տվյալները, բայց անկախ ուսումնասիրություն է կատարվում գույքերով»,- ասաց Աբրահամյանը։

Ըստ Աբրահամյանի՝ ուսումնասիրության արդյունքում առերևույթ ապօրինի ձեռքբերված բոլոր գույքերի նկատմամաբ կիրառվել է արգելանք։ «Իրենք հիմա հնարավորություն ունեն ծանուցումից հետո մեկամսյա ժամկետում գալ, ծանոթանալ ուսումնասիրության վարույթի նյութերին, դրա վերաբերյալ դիրքորոշում հայտնել։ Դրանից հետո երկու տարբերակ կա․ կա՛մ գործընթացը գնում է համաձայնեցման ճանապարհով, այսինքն՝ համաձայնություն է ձեռք բերվում Դատախազության և համապատասխան սուբյեկտների միջև ապօրինի ծագում ունեցող գույքի առնվազն 75 տոկոսը պետությանը փոխանցելու վերաբերյալ, կա՛մ, եթե իրենք համաձայնության չեն գալիս Դատախազության հետ, ապա Դատախազությունը հայց է ներկայացնում դատարան ամբողջ ծավալով բռնագանձում իրականացնելու վերաբերյալ»,- մանրամասնեց գլխավոր դատախազի խորհրդականը։

Արփի Հակոբյան