Քաղաքականություն
11.07.2022 | 12:09
Ռուսաստանը կրճատում է գազի մատակարարումները դեպի Եվրոպա` հասցնելով պատմական նվազագույնին։ Երկուշաբթի գիշերը «Գազպրոմը» փակել է մատակարարման հիմնական ուղին՝ Բալթիկ ծովի հատակով անցնող «Հյուսիսային հոսքը», որով վառելիքը մղվում էր դեպի Գերմանիա: Որպես հիմնավորում նշվել են 10-օրյա պրոֆիլակտիկ աշխատանքներըր, բայց Եվրոպայում մտավախություն ունեն, որ մատակարարումն այլևս չի վերականգնվի։
Գերմանիան արդեն տաք ջրի մատակարարման նոր մոտեցումներ է մշակում, օպտիմալացնում նաև փողոցային լուսավորությունը, իսկ ողջ Եվրոպան պատրաստվում է հայտարարել արտակարգ միջոցառումների մասին, որի ծրագիրը կհրապարակվի այս շաբաթ, գրում է BBC-ի ռուսական ծառայությունը:
«Իրավիճակը շատ լուրջ է, և ճգնաժամը կարող է ավելի սրվել: Հնարավոր է, որ Ռուսաստանը շարունակի նվազեցնել գազի մատակարարումները», – խոստովանել է եվրահանձնակատար Կադրի Սիմսոնը «Հյուսիսային հոսքի» պրոֆիլակտիկ անջատումից անմիջապես առաջ:
Երեք տարի առաջ «Գազպրոմը» Եվրոպային մատակարարում էր օրական մինչև 500 մլն խմ գազ, այս տարվա մայիսին՝ օրական ընդամենը 250 մլն, հուլիսի սկզբին` 140 մլն, ընդ որում՝ պրոֆիլակտիկ անջատման պահին «Թուրքական հոսքով» գազամատակարարման մատակարարումը ևս կրճատվել է՝ հասնելով օրական մոտ 100 մլն խմ-ի։ Առաջիկա 10 օրվա ընթացքում Եվրոպային խոստանում են ընդամենը 75 միլիոն խմ գազ։
«Մենք պետք է պատրաստվենք գազի մատակարարման հետագա ընդհատումներին և նույնիսկ Ռուսաստանի կողմից ամբողջական դադարեցմանը», – անցյալ շաբաթ Եվրախորհրդարանին նախազգուշացրել էր Եվրահանձնաժողովի ղեկավար Ուրսուլա ֆոն դեր Լեյենը:
«Առանց արտակարգ իրավիճակների ընդհանուր ծրագրի ԵՄ-ի 27 երկրները չեն կարողանա պաշտպանել իրենց 450 միլիոն քաղաքացիներին և աշխարհի երկրորդ խոշորագույն տնտեսությանը զանգվածային ճգնաժամից: Միայնակ գործելու ժամանակն անցել է։ Ուստի՝ Եվրահանձնաժողովը (փաստացիորեն՝ ԵՄ կառավարությունը) մինչև այս շաբաթվա վերջ իշխանություններին կներկայացնի էներգետիկ ճգնաժամի դեմ պայքարի արտակարգ ծրագիր»,- ասել է ֆոն դեր Լեյենը։
Տաթև Ֆռանգյան
