16.07.2026 | 01:03
ԱԱ-2026․ Եզրափակիչում՝ Իսպանիա – Արգենտինա․ ՏԵՍԱՆՅՈՒԹ
Գյումրու քաղաքապետարանում բազմաթիվ թափուր պաշտոններ կան․ մրցույթներ դեռ չեն կարող հայտարարել
Հասարակություն
08.07.2022 | 22:05
Գյումրու քաղաքապետարանում երկու տասնյակի հասնող թափուր հաստիքներ կան, որոնց համալրման համար պետք է մրցույթներ հայտարարվեն։ Այս պահին տարբեր բաժինների պետի պաշտոնում ժամանակավոր պաշտոնակատարներ են նշանակված․ մի մասը «Բալասանյան դաշինք»-ի կողմից, մյուսներն էլ՝ ՔՊ-ի։
Ինչպես տեղեկանում ենք Գյումրու համայնքապետարանի պաշտոնական էջից, շատ քիչ պաշտոններ կան, որոնք ամբողջովին թափուր են՝ ո՛չ պետ ունեն, ո՛չ ժ/պ․ դրանցից մեկը՝ քաղաքաշինության և ճարտարապետության բաժնի պետի հաստիքն է, մյուսը՝ իրավաբանական բաժնի պետինը։
Գյումրու քաղաքապետարանի աշխատակազմի քարտուղար Կարեն Բադալյանի պարզաբանմամբ, այս պահին չեն կարող մրցույթներ հայտարարել, քանի դեռ ՀՀ տարածքային կառավարման և ենթակառուցվածքների նախարարությունը չի հաստատել Գյումրու ավագանու կողմից վերջերս ընդունված աշխատակազմի կառուցվածքային փոփոխությունները՝ նոր հաստիքացուցակը։
Նշենք, որ տարիներ շարունակ մրցույթներ չեն հայտարարվել նաև Գյումրու համայնքապետարանի ենթակայության տակ գործող ՀՈԱԿ-ների՝ երաժշտական դպրոցների, սպորտդպրոցների, թանգարանների տնօրենների պաշտոնների համար։ Բոլոր ՀՈԱԿ-ների տնօրենների հաստիքները զբաղեցնում են ժամանակավոր պաշտոնակատարները։ Նրանցից ոմանք այդ կարգավիճակում են արդեն 6-7 տարի շարունակ։ Մոտ երկու տասնյակի հասնող թափուր պաշտոններ էլ ՀՈԱԿ-ներում կան։ Մեր հարցին ե՞րբ մրցույթ կհայտարարվի ՀՈԱԿ-ների տնօրենների թափուր պաշտոնների համար, Կարեն Բադալյանը պատասխանեց․ «Դեռ չենք հայտարարել մրցույթ, բայց դա ընթացքի մեջ է, մոտ ժամանակներս կհայտարարենք»։
Արմիկ Մովսիսյան
