«Ուրախացա, որ որդուս մարմինը գտա». վիրավոր Հենրիկին Սիսիանի հոսպիտալից նորից ճակատ են ուղարկել․ ՏԵՍԱՆՅՈւԹ

Տիկին Համեստն ամեն անգամ խնամքով լվանում, արդուկում է որդու՝ Հենրիկ Էլոյանի զինվորական համազգեստը։ Տանն ամեն ինչ Հենրիկին է հիշեցնում․ ամեն անկյունում նրա լուսանկարներն են, մեդալները, իրերը։  Ծառայության 1 տարին լրացել էր, երբ սկսվեց 44-օրյա պատերազմը։ Հոկտեմբերի 7-ին Հորադիզի շրջանում հակագրոհի ընթացքում վիրավորվել էր, բայց ընտանիքին հանգստացրել՝ ասելով, թե ամեն ինչ կարգին է։

Խնձորեսկի հոսպիտալ տեղափոխելուց հետո մայրն իմացել է, որ տղայի ողնաշարից մեկ բեկոր չի հեռացվել․ պետք է վիրահատեն։ Այստեղից Հենրիկին Սիսիանի հոսպիտալ են տեղափոխել, որտեղից էլ մայրը մեկ շաբաթով տուն է բերել տղային։ Հարազատները համոզել են, որ հետ կանգնի կրկին սահման մեկնելու մտքից, բայց Հենրիկը հաստատ որոշել էր զինակից ընկերներին մենակ չթողնել մարտի դաշտում։

Ըստ տիկին Համեստի՝ Սիսիանի հոսպիտալից, առանց դուրս գրելու, Հենրիկին ուղարկել են սահման՝ բեկորը ողնաշարի մեջ։

Արդեն դեկտեմբերին տիկին Համեստը Սիսիանի հոսպիտալից կարողացել է վերցնել Հենրիկի բուժման թղթերը, որտեղ գրված է, թե տղային վիրահատել են և ծառայության ուղարկել ապաքինված։ Մայրը պնդում է՝ չէին կարող մեկ օրվա ընթացքում վիրահատել ու հաջորդ օրն ուղարկել սահման։

Տիկին Համեստն ասում է՝ որդու զոհվելու օրը զգում էր, որ ինչ-որ վատ բան է լինելու։ Միայն շաբաթներ անց են իմացել, որ Հենրիկը զոհվել է հենց այդ օրը՝ անօդաչու թռչող սարքի հարվածից։

Ասում է՝ Հենրիկը ծառայության ընթացքում ոչնչից չի դժգոհել, բայց տիկին Համեստն է դժգոհ հրամանատար Արո Հարինյանի վերաբերմունքից:

Ծնողները Հենրիկի մարմինը գտել են միայն 68 օր անց։

«Տենց մորգ չկա, որ ինձ չճանաչեն, ուրախացել էի, որ երեխուս մարմինը գտել էի»,- ասում է տիկին Համեստը:

Հենրիկն Արցախի նախագահի կողմից հետմահու պարգևատրվել է «Մարտական ծառայություն» մեդալով և «Մարտական խաչ» 2-րդ աստիճանի շքանշանով։  Ո՞ւմ են պետք այս շքանշանները, որ Հենրիկն այլևս չկա՝ հարցնում է տիկին Համեստը։ Հիմա ամեն օր Եռաբլուր է գնում, ասում է՝ գոնե այնտեղ կարողանում է ստանալ բոլոր ինչուների պատասխանները։

Մանրամասները` տեսանյութում

Արփի Հակոբյան