Սաղաթելյանը ձախողել է, չի կատարել իր պարտականությունները. Ջուլհակյանը ներկայացրեց Սաղաթելյանի պաշտոնանկության նախագիծը․ ՏԵՍԱՆՅՈՒԹ

ԱԺ արտահերթ նիստում քննարկվում է «Քաղաքացիական պայմանագիր» խմբակցության ներկայացրած՝ պատգամավոր Իշխան Սաղաթելյանին ԱԺ նախագահի տեղակալի պաշտոնից հետ կանչելու վերաբերյալ որոշման նախագիծը:

«Սաղաթելյանը ձախողել է, չի կատարել իր պարտականությունները»,- ներկայացնելով նախագիիծը՝ ընդգծեց «Քաղաքացիական պայմանագիր» խմբակցության պատգամավո Արուսյակ Ջուլհակյանը:

Նրա խոսքով՝ «ԱԺ կանոնակարգ» սահմանադրական օրենքի 4-րդ հոդվածի 1-ին մասի 2-րդ կետի համաձայն՝ պատգամավորը պարտավոր է մասնակցել ԱԺ-ի, ինչպես նաև իր անդամակցած հանձնաժողովի և աշխատանքային խմբերի նիստերին, այնինչ Իշխան Սաղաթելյանը 2022 թվականի հունվարի 17-ից հունիսի 29-ը ներառյալ, այսինքն` առաջին օրացուցային կիսամյակի  նիստերի 342 քվեարկություններից ունեցել է 198 բացակա:

«ԱԺ կանոնակարգ» սահմանադրական օրենքի 6-րդ հոդվածի 3-րդ մասի համաձայն` ԱԺ նախագահի տեղակալները մասնակցում են ԱԺ խորհրդի նիստերին: Նշվածը նշանակում է, որ ԱԺ խորհրդի նիստերին մասնակցությունն ԱԺ նախագահի տեղակալի անմիջական պարտականությունն է: 8-րդ գումարման Ազգային ժողովի խորհուրդն իր ձևավորման պահից, այսինքն` 2021 թվականի օգոստոսից առ այսօր գումարել է 25 նիստ: ԱԺ նախագահի տեղակալ Իշխան Սաղաթելյանը նշված 25 նիստից միայն 7-ին է ներկա եղել:

«Իշխան Սաղաթելյանի հաճախակի բացակայությունների պատճառով նաև անհնարին է դարձել վերջինիս՝ ԱԺ նախագահի կողմից հանձնարարություններ տալը և լիազորությունների պատվիրակումը, ինչի հետևանքով նաև չեն իրացվել «ԱԺ կանոնակարգ» սահմանադրական օրենքի 6-րդ հոդվածի 2-րդ մասով սահմանված նորմերը»,- նշեց Ջուլհակյանը:

Պատգամավորը նաև հավելեց, որ Սաղաթելյանի կողմից բախումներ հրահրելու դեպքեր են արձանագրվել:

«Սաղաթելյանը նաև հանդես է եկել մի շարք վիրավորական արտահայտություններով, սպառնալիքներով, ատելության խոսքով»,- նշեց Ջուլհակյանը՝ ընդգծելով, որ Սաղաթելյանը չի կատարել քաղաքացիական համերաշխությանն ուղղված իր առաքելությունը:

Մանրամասները՝ տեսանյութում: