Արոտավայրից՝ գերեզմանատուն․ Գյումրիում նոր գերեզմանատան կառուցումը ձգձգվում է

Գյումրու համայնքապետարանի ֆինանսական միջոցներով հարակից Շիրակ գյուղից ձեռք բերված 8 հեկտար հողատարածքը, որտեղ պետք է նոր գերեզմանատուն կառուցվի, գյուղատնտեսական նշանակության է։ Այս պահին փոփոխության է ենթարկում հողատարածքի գործառնական նշանակությունը, այդ պատճառով էլ նոր գերեզմանատան կառուցումը փոքր-ինչ ձգձգվում է։ Այս մասին Factor TV-ի հետ զրույցում ասաց «Հավերժ հիշատակ» ՓԲԸ տնօրեն Էդուարդ Բաղրամյանը։

«Այդ հողատարածքը մենք գնել են որպես արոտավայր, որպեսզի կարողանանք նախագիծ պատվիրել։ «Արոտավայր» հասկացությունը պիտի փոխարինվի կոմունալ, էներգետիկ ենթակառուցվածքների նշանակությամբ, արոտավայրում թաղումներ անելու իրավունք չունես, չի թույլատրվում, հողի նշանակության փոփոխություն պիտի տեղի ունենա։ Հողի գործառնական նշանակությունը փոխել կարող են համայնքապետարանը՝ մարզպետարանի հետ միասին, համապատասխան նախարարությունների համաձայնությամբ։ Հիմա այդ փուլում ենք, փաստաթղթերը շրջանառության մեջ են, ուսումնասիրում են»,- ասաց մեր զրուցակիցը։

Նա նաև նշեց, որ այդ հողատարածքի հետ զուգահեռ՝ Գյումրու քաղաքապետարանը Շիրակ գյուղից գնել է նաև երեք հողակտոր, որտեղ նախորդ տարիներին հուղարկավորություններ են կատարվել գյումրեցիների կողմից։ Ըստ Բաղրամյանի՝ այդ հողատարածքներն ապօրինի են օգտագործվել, դրանք ձեռք բերելու համար ևս անհրաժեշտ է համապատասխան գերատեսչությունների թույլտվությունը։

Ըստ քաղաքապետարանի պաշտոնյայի՝ երբ հաստատվի հողատարածքների գործառնական նշանակության փոփոխությունը, դրանից հետո միայն կկարողանան նախագիծը պատվիրել։
Նախագծում պարտադիր պետք է լինի տարածքի հարթեցում, բաշխումներ, հասցեագրումներ։

«Ամբողջ աշխարհում այդպես է, նախկինում մեզ մոտ էլ է այդպես եղել, իսկ հիմա գերեզմանների տարածքի պակասի պատճառով անցուղիները փակվել են։ Այս տարի կհասցնենք կառուցել, թե՝ ոչ, կախված է փաստաթղթերի հաստատումից»,- ասաց Էդուարդ Բաղրամյանը։

Նշենք, որ Գյումրի քաղաքն ունի երեք գերեզմանատներ՝ թիվ 1, թիվ 2 և «Շիրակ» գերեզմանոցը՝ Շիրակ համայնքի հարևանությամբ։ Դրանք, սակայն, այլևս բավարար չեն հուղարկավորություններ կազմակերպելու համար։

1-ին և 2-րդ գերեզմանոցները վաղուց համարվում են կիսափակ, այնտեղ հողատարածքի հատկացում չի կատարվում, ընդամենը մնացել են ընտանեկան գերեզմանները, որտեղ հուղարկավորությունները շարունակվում են։ Գրեթե նույն վիճակում է «Շիրակ» գերեզմանոցը, այն վաղուց դուրս է եկել իր տարածքի սահմաններից։

Արմիկ Մովսիսյան