Անձի ֆետիշացումն ու սրբադասումն ի վնաս Փաշինյանի է, դա ժողովրդին վերածում է ամբոխի․ Արքմենիկ Նիկողոսյան. ՏԵՍԱՆՅՈՒԹ

«Շատ կարևոր է, որ այսօր Նիկոլ Փաշինյանի համակիրների զգացմունքներն ու էմոցիաները հետագայում չվերածվեն ատելության դրսևորումների, կամ անձի սրբադասման, որն ի վնաս Փաշինյանի է։ Անձի ֆետիշացումը, պաշտամունքը ժողովրդին վերածում է ամբոխի, իսկ ամբոխն ակամա պահանջում է ևս մեկ դիկտատորի»,-Factor.am-ի հետ զրույցում նման տեսակետ է հայտնում գրականագետ, «Անտարես» հրատարակչության գլխավոր խմբագիր Արքմենիկ Նիկողոսյանը։

Նա գովելի է համարում Նիկոլ Փաշինյանի բաց և թափանցիկ գործելաոճը, բայց միևնույն ժամանակ զգուշացնում է, որ ապագայում նա կարող է, օրինակ, ֆեյսբուքյան ուղիղ եթերներ նույն ակտիվությամբ չապահովել․ «Ամեն դեպքում, չպետք է մոռանալ, որ գործ ունենք երկրի առաջին դեմքի հետ, և գաղտնիության որոշակի սկզբունք գոյություն ունի, որը պետք է պահպանվի։ Չեմ բացառում, որ այդպիսով ինչ-որ մարդիկ կհիասթափվեն, բայց դա էլ պետության կառուցման շարունակական գործոն է»։

Պարոն Նիկողոսյանն անդրադառնում է նաև մշակույթի նախարարի պաշտոնում հնարավոր նշանակումների թեմային․ «Ոչ ոք չի առաջարկում ինչ-որ մեկին նշանակել, օրինակ, պաշտպանության, ֆինանսների նախարարի պաշտոնում, բայց քննարկվում է մշակույթի նախարարի նշանակման հարցը։ Անգամ կան մարդիկ, որոնք ասում են, որ իրենք պետք է լինեն նախարար։ Սա տխուր իրողություն է, և նշանակում է, որ լուրջ չեն ընդունում նախարարությանը կամ բարձիթողի վիճակում են պատկերացնում այն»։

Մանրամասները՝ տեսանյութում։

Աննա Բաբաջանյան