12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Բացասական վերաբերմունք ենք հայտնել․ ՀՌՀ նախագահը՝ Տեսալսողական մեդիայի օրենքի փոփոխությունների մասին. ՏԵՍԱՆՅՈՒԹ
Քաղաքականություն
20.06.2022 | 14:18
«2020 թվականին, երբ մշակվում էր «Տեսալսողական մեդիայի մասին» այսօր գործող օրենքը, մենք մոտավորապես կես տարի աշխատել ենք այդ օրենքի նախագծի վրա՝ լայն կազմով, և արդյունքում, այնուամենայնիվ, այս օրենքը բազմաթիվ թերություններ ունի: Այդ բացթողումների մասին մենք սկսեցինք հասկանալ օրենքի իրագործման ժամանակ»,- «Տեսալսողական մեդիայի մասին» օրենքի փոփոխությունները՝ գործիք» թեմայով քննարկման ժամանակ այս մասին նշեց ՀՌՀ նախագահ Տիգրան Հակոբյանը:
Նրա դիտարկմամբ՝ նախ պետք է մշակել օրենքի հայեցակարգը, փիլիսոփայությունը, և թե ինչ վտանգներ կան գործող օրենքում ու ինչպես պետք է ներդաշնակեցնել օրենսդրական դաշտը:
Տիգրան Հակոբյանի խոսքով՝ օրենքի նոր նախագծի մշակման ժամանակ ՀՌՀ ներկայացրած առաջարկները չեն քննարկվել: ՀՌՀ նախագահի դիտարկմամբ՝ ՀՀ բարձր տեխնոլոգիական արդյունաբերության նախարարությունը չէր կարող պրոֆեսիոնալ կերպով մշակել այս օրենքի նախագիծը:
Հեռուստատեսության և ռադիոյի հանձնաժողովի նախագահը հավելեց, որ ներկայացվել է ՀՌՀ-ի բացասական վերաբերմունքը թե՛ «Տեսալսողական մեդիայի մասին» օրենքի բովանդակության նկատմամբ, թե՛ նախարարության աշխատելաոճի. «Երբ որ շատ արագ մի բան են անում, և արդյունքում ստացվում է ավելի վատ օրենք, քան գործող օրենքն է»:
Նշենք, որ հունիսի 21-ին ավարտվում է պաշտոնական e-draft.am հարթակում տեղադրված` «Տեսալսողական մեդիայի մասին» և հարակից օրենքներում լրացումներ և փոփոխություններ կատարելու մասին օրենքի նախագծի ներկայացման ժամկետը։
ՀՀ բարձր տեխնոլոգիական արդյունաբերության նախարարության հեղինակած այս օրենսդրական նախաձեռնությունը մտահոգություն է առաջացրել մի շարք մասնագիտացված լրագրողական կազմակերպությունների շրջանում, ընդ որում՝ և՛ օրինագծի բովանդակության, և՛ դրա մշակման ու ներկայացման գործընթացի առումներով։
Մանրամասները՝ տեսանյութում:
