Քաղաքացիները մեզ ճնշում են, ասում են` փողոցները բացեք. Արմեն Խաչատրյան․ ՏԵՍԱՆՅՈՒԹ

Ընդդիմադիր պատգամավորներին մանդատից զրկելու ուղղությամբ քայլեր չեն արվել։ Այս մասին ԱԺ-ում լրագրողների հետ զրույցում հայտարարեց «Քաղաքացիական պայմանագիր» խմբակցության պատգամավոր Արմեն Խաչատրյանը՝ նշելով, որ բացականները սահմանված կարգով արձանագրում են, ինչն ազդում է պատգամավորների աշխատավարձերի վրա։

«Իշխող ուժի հակվածությունը պայմանավորված է ընդդիմության վարքագծով. կտեսնենք՝ ինչպես է իրեն դրսևորում ընդդիմությունը, ըստ այդմ էլ որոշում կկայացնենք»,- ասաց Խաչատրյանը:

«Ակցիաները պետք է լինեն արտոնված և չպետք է վերածվեն զանգվածային անկարգությունների: Իշխանությունները քաղաքացիների կողմից մեծ ճնշման տակ են, պահանջում են, որ երթևեկությունը կարգավորվի և քաղաքացիներն անհարմարություններ չկրեն: Զանգելով և ցանկացած հանդիպման ու շփման ժամանակ քաղաքացիներն ասում են՝ բացե՛ք փողոցները, Երևանի երթևեկությունը վերականգնե՛ք»,- նշեց Խաչատրյանը՝ չբացառելով, որ ցուցարարների վրանները հավաքելու որոշում կկայացվի:

Անդրադառնալով դիտարկմանը, որ հանրահավաքների ժամանակ ոստիկանությունը հատուկ միջոցներ է կիրառել առանց նախազգուշացում անելու, Խաչատրյանը նշեց. «Ոստիկանության գործողություններն իրավաչափ են եղել և հանդուրժողական… Զանգվածային անկարգությունների պայմաններում ոստիկանությունը պարտավոր է կիրառել հատուկ միջոցներ, կիրառվել է ամենաթեթև հատուկ միջոցներից մեկը: Արդեն մոտ երկու ամիս է ոստիկանությունը ծանրաբեռնված ռեժիմով ծառայություն է իրականացնում, հատուկ միջոցներ չեն կիրառվում»:

Իշխանական պատգամավորը նաև ընդգծեց, որ, իր դիտարկմամբ, Հայաստանում քաղաքական ճնաժամ չկա:

Մանրամասները՝ տեսանյութում: