28.06.2026 | 16:37
Բագրատաշենի մաքսային կետում մաքսային ձևակերպումներն իրականացվել են անխափան և բնականոն ընթացքով. ՊԵԿ
Քրեական գործ է հարուցվել «ՍԱՍ»-ի Արտակի՝ արտերկրում գրանցված ընկերությունները չհայտարարագրելու ենթադրյալ փաստերով
Հասարակություն
09.06.2022 | 17:10
2022 թվականի մայիսի 15-ին նախկին պատգամավոր Արտակ Սարգսյանի` («ՍԱՍ»-ի Արտակ)՝ արտերկրում գրանցված ընկերությունները չհայտարարագրելու դեպքով Հակակոռուպցիոն կոմիտեում քրեական գործ է հարուցվել՝ Քրեական օրենսգրքի 314.3-րդ հոդվածի 2-րդ մասի հատկանիշներով՝ այն է՝ հայտարարագրերում կեղծ տվյալ ներկայացնելը կամ հայտարարագրման ենթակա տվյալը թաքցնելը, որը հանգեցրել է առանձնապես խոշոր չափերով (1 մլն դրամը գերազանցող) գույքի կամ եկամտի չհայտարարագրմանը, պատժվում է 2-4 տարի ազատազրկմամբ՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից առավելագույնը 3 տարով զրկելով կամ առանց դրա: Այս մասին Factor.am-ի հետ զրույցում ասաց գլխավոր դատախազի խորհրդական Գոռ Աբրահամյանը։
Քրգործ հարուցելու առիթը եղել է ապրիլի 29-ին «Հետք»-ում հրապարակված ««ՍԱՍ»-ի Արտակը՝ «Պանդորայի փաստաթղթերում». նախկին պատգամավորը չի հայտարարագրել արտերկրում գրանցված ընկերությունները» վերնագրով հետաքննությունը։
«Մեր մոնիթորինգի արդյունքում այն արձանագրվել, մուտքագրվել, ուսումնասիրվել և Գլխավոր դատախազությունից ուղարկվել է Հակակոռուպցիոն կոմիտե, որպեսզի այնտեղ Քրեական դատավարության օրենսգրքի 180-181-րդ հոդվածներով սահմանված կարգով նյութեր նախապատրաստեն և որոշեն ընթացքը»,- ասաց Գոռ Աբրահամյանը։
Նրա տեղեկացմամբ՝ կատարվում է նախաքննություն։
Արփի Հակոբյան
