Վիտալի Բալասանյան, Աշոտ Ղուլյան, պատերա՛զմ ուղարկեիք ձեր լաոներին․ թաքցրել-փախցրել եք, հիմա փրկիչ եք խաղում․ Տիգրան Պետրոսյան․ ՏԵՍԱՆՅՈՒԹ

Արցախի բնակչության մեծ մասն անտարբեր է ՀՀ-ում ընթացող ներքաղաքական պրոցեսների նկատմամբ՝ մերժողական կեցվածք ունեն թե՛ նախկին, թե՛ ներկա իշխանության նկատմամբ։ Արցախցիներին այս պահին մեծամասամբ հետաքրքրում է իրենց խնդիրները՝ կան անկումային տրամադրություններ, սոցիալական պրոբլեմներ, արտագաղթի ցանկություն, և չեն հետևում ՀՀ-ի ներքաղաքական պայքարին, Factor TV-ի հարցազրույցում ասում է «Վաղվա Արցախ» կուսակցության համահիմնադիր Տիգրան Պետրոսյանը։

Մայիսի 28-ին Արցախում երթ էր անցկացվել Նիկոլ Փաշինյանի հրաժարականի պահանջով։ Նշանակո՞ւմ է, արդյոք, որ ամբողջ ԼՂ-ում չեն վստահում ՀՀ իշխանությանը, և ովքե՞ր են կազմակերպիչները։ Արցախում գործունեություն ծավալող ընդդիմադիր գործիչը նշում է․ «Նայում եմ՝ Երևանի հավաքներին նաև ղարաբաղցիներ են մասնակցում։ Կարող է՝ սխալ կարծիք է, բայց նրանց մեջ կռված տղաներ էլ կան։ Բայց մարդիկ կան՝ առաջին օրվանից փախեն են Ղարաբաղից, հիմա այդտեղ ասֆալտին նստած՝ Արցախ են փրկում։ Լուրջ չէ, պետք չէ դրանց հանդուրժել»։

«Վաղվա Արցախ» կուսակցության ներկայացուցիչն անդրադառնում է նաև մայիսի 28-ի հավաքին․ «Այստեղ «Վիտոյի» կուսակցությունն է՝ «Արդարությունը»։ Որտե՞ղ է եղել Վիտոյի տղան կռվի ժամանակ, բա զարթնացնեիր լաոյիդ, կամ ԱԺԿ-ի Աշոտ Ղուլյանը երկար տարիներ ԱԺ նախագահ է եղել, ԱԺԿ-ի պատգամավորներն էլ էին ինչ-որ կոչեր արել։ Բա դո՞ւք որտեղ էիք, ձեր կուսակցության նախագահի որդիները որտե՞ղ են եղել։ Զարթնացնեիք ձեր լաոներին, 20 թվականին զարթնացնեիք, ուղարկեիք պատերազմ, ասեինք՝ հայրենասեր եք։ Թաքցրել-փախցրել եք, հիմա եկել, փրկիչներ եք խաղում։ Փախած վիճակ էր նրանց մոտ, բոլորն էլ գիտեն՝ որտեղ են եղել, դրանցից ոչ մեկն էլ պատերազմին չի մասնակցել»։

Հարցազրույցն ամբողջությամբ՝ տեսանյութում։

Ռոբերտ Անանյան