06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Սահմանամերձ բնակավայրերում տուն կառուցելու համար Կառավարությունը օգնություն կտրամադրի․ ՏԵՍԱՆՅՈՒԹ
Տնտեսություն
09.06.2022 | 11:33
Կառավարության այսօրվա նիստում գործադիրը հաստատեց սահմանամերձ բնակավայրերում ընտանիքների բնակարանային մատչելիության ապահովման պետական աջակցության 2022-2024 թվականների ծրագիրը։
Ինչպես նշեց աշխատանքի և սոցիալական հարցերի նախարար Նարեկ Մկրտչյանը, ծրագրի նպատակը սահմանամերձ գյուղական բնակավայրերի համաչափ զարգացումն է։
Այս ծրագրով սահմանված աջակցությունը տրամադրվում է սահմանամերձ գյուղական բնակավայրում անհատական բնակելի տուն կառուցելու համար հիփոթեքային վարկ ստացած շահառուին, և ուղղվում է հիփոթեքային վարկի ամենամսյա վճարների (մայր գումարի և տոկոսագումարների) մարմանը։
Պետական աջակցության չափը կազմում է հիփոթեքային վարկով անհատական բնակելի տուն կառուցելու դեպքում հիփոթեքային վարկի մայր գումարի ամսական վճարների մարման համար՝ հանրագումարային մինչև 12 մլն դրամ, բայց ոչ ավելի, քան ամսական 171 հազար դրամ, իսկ տոկոսագումարների մարման համար՝ մինչև 12%, հանրագումարային մինչև 8.660 մլն դրամ, բայց ոչ ավելի, քան ամսական 120 հազ. դրամ։ Պետական աջակցությունն, ընդհանուր առմամբ, հիփոթեքային վարկի սպասարկման տասը տարիներին կազմելու է 20 մլն 660 հազար դրամ։
«Հանրապետությունում ներկայումս առկա է 79 սահմանամերձ գյուղական բնակավայր, որոնք ընդգրկված են ՀՀ 6 մարզերում։ Մարզային և մասնավորապես սահմանամերձ գյուղական բնակավայրերում վարկային բեռը թեթևացնելով` ընտանիքներին հնարավորություն կընձեռվի անհատական բնակելի տուն կառուցել իրենց իսկ նախընտրած սահմանամերձ գյուղական բնակավայրում»,- նշեց նախարարը։
Մանրամասները՝ տեսանյութում:
