02.03.2026 | 23:40
Հայաստանի մի շարք հասցեներում էլեկտրաներգիայի անջատումներ կլինեն
Գողացված փողերով որոշ ՀԸ-ներ ֆինանսավորվում են, ինչո՞ւ եք միայն Հ1-ից խոսում. Տիգրան Հակոբյան․ ՏԵՍԱՆՅՈՒԹ
Քաղաքականություն
07.06.2022 | 15:14
Հանրային մուլտիպլեքսում գործող հեռուստաալիքները պարտավոր են լուսաբանել ամբողջ Հայաստանի անցուդարձը, նրանք միտինգների քարոզչական ապահովման գործիք չեն՝ ըստ օրենքի: Այս մասին այսօր ԱԺ-ում լրագրողների հետ զրույցում ընդգծեց Հեռուստատեսության և ռադիոյի հանձնաժողովի նախագահ Տիգրան Հակոբյանը՝ անդրադառնալով օրեր առաջ Facebook-ի գրառմանը, որտեղ նշել էր, որ հանրային մուլտիպլեքսում գործող երկու հեռուստաընկերություն իրենց եթերային քաղաքականությամբ համառ ջանքեր են գործադրում, որպեսզի իրենց հեռարձակման լիցենզիան առնվազն կասեցվի:
«Եթե ուզում են քարոզչական գործիքներ լինել, կարող են յութուբյան ալիքներ բացել և հանգիստ այդ գործը կատարել: Մենք պարտավոր ենք օրենքը պաշտպանել: Տեսեք ինչ տեղեկատվական հոսքեր կան, որոնք ստեղծում են մանիպուլյցիայի, պրոպագանդայի, ուղեղների լվացման մի մեծ մթնոլորտ: Եվ նորմալ էկոլոգիական միջավայրը պահելու համար բոլոր հեռուստաընկերությունները իրենց առաջարկում գրում են, որ պահպանելու ենք բազմակարծությունը, բազմազանությունը, տարբեր տեսակետների լուսաբանումը: Ոչ թե գրել են, որ եթե միտինգ լինի այն քաղաքական ուժի, որին համակրում ենք, մենք շուրջօրյա պետք է լուսաբանենք այդ միտինգները: Եթե լրատվական հաղորդման 90 տոկոսը տրվում է մեկ թեմայի, դա արդեն քարոզչություն է, ոչ թե լրատվություն»,- նշեց Հակոբյանը:
Նրա խոսքով՝ այդ հեռուստաընկերությունները այս տարվա ընթացքում մի քանի նամակ են ստացել ՀՌՀ-ից խնդրանքով, հորդորով, և դրանից պետք է հետևություններ անեին: «Եթե տարվա մեջ լինում են էթիկայի կանոնների մի քանի խախտումներ, հետո լինում է հայհոյանք, որը դատապարտելի է, կան բռնության կոչեր, կան հեղինակային իրավունքի խախտում: Երբ այդ ամենը հավաքվում է, դա կոչվում է լիցենզիոն պայմանների խախտում:
Ես որևէ հեռուստաընկերության անուն չեմ տվել, եթե ինչ-որ հեռուստաընկերություն իր վրա վերցրել է, նշանակում է զգացել է, որ ինչ-որ խախտումներ արել է: Մենք փորձում են այնպես անել, որ պրոպագանդային բաղադրիչը հանրային մուլտիպլեքսում պակասի»,- նշեց ՀՌՀ նախագահը:
ՀՌՀ նախագահի կարծիքով՝ բավականին մեծ խախտումներ են նկատվում ցանկացած հեռուստաընկերության գործունեության ընթացքում. «Դուք դա կուլ եք տալիս, չեք խոսում այդ մասին, խոսում եք միայն Հանրայինի մասին»:
Դիտարկմանը, որ Հանրայինը հարկատուների ֆինանսավորմամբ է աշխատում, Հակոբյանն արձագանքեց. «Գողացված փողերով որոշ ՀԸ-ներ ֆինանսավորվում են, ինչո՞ւ եք միայն Հ1-ից խոսում»:
Հարցին, թե որ հռուստաընկերությունների մասին է խոսքը, ՀՌՀ նախագահը չպատասխանեց:
Մանրամասները՝ տեսանյութում:
