20.08.2026 | 09:40
ՀՀ տարածքում ավտոճանապարհներն անցանելի են
Թուրքիան, Ռուսաստանը, Ուկրաինան և ՄԱԿ-ը քննարկելու են հացահատիկով նավերի դուրսբերման հարցը․ Չավուշօղլու
Քաղաքականություն
02.06.2022 | 22:02
Թուրքիայի ԱԳ նախարար Մևլութ Չավուշօղլուն հայտարարել է, որ մոտ օրերս կայանալիք հանդիպման ժամանակ Թուրքիան, Ուկրաինան, Ռուսաստանը և ՄԱԿ-ը կքննարկեն Ստամբուլում մեխանիզմի ստեղծման հարցը՝ վերահսկելու ծովով հացահատիկով նավերի դուրսբերման հնարավորությունը, գրում է ՌԻԱ Նովոստին։
Ավելի վաղ Չավուշօղլուն հայտնել էր, որ ՄԱԿ-ն առաջարկ ունի՝ ստեղծելու կոնտակտային խումբ չորս կողմերի մասնակցությամբ (Ռուսաստան, Ուկրաինա, Թուրքիա, ՄԱԿ)՝ ուկրաինական նավահանգիստներից հացահատիկով նավերի դուրսբերման հարցով։ Նրա խոսքով՝ Թուրքիան սկզբունքորեն համաձայնել է և առաջարկել տեխնիկական հանդիպում անցկացնելու գաղափարը։
«Մի կողմից՝ մենք փորձում ենք կողմերին նստեցնել բանակցությունների սեղանին, մյուս կողմից՝ ստեղծել անվտանգ միջանցք ականներից զերծ ծովով ուկրաինական հացահատիկով նավերի դուրսբերման համար։ Մենք՝ ՄԱԿ-ը, Թուրքիան, Ռուսաստանը և Ուկրաինան, ջանք ենք թափում այս ուղղությամբ։ Մենք դիմումներ ենք ստանում երկրներից, որոնք ցանկանում են միանալ այս գործընթացին: Այստեղ մրցակցություն չկա, բայց բոլորը Թուրքիային տեսնում են որպես առանցքային երկիր, մենք շահել ենք կողմերի վստահությունը։ Արդյունքում, Ստամբուլում կստեղծենք կենտրոն, առաջիկա օրերին կքննարկենք այդ մեխանիզմը տեխնիկական հանդիպման ժամանակ»,- ասել է Չավուշօղլուն։
Հավելենք, որ ավելի վաղ էլ Չավուշօղլուն հայտնել էր, որ ՌԴ ԱԳ նախարար Սերգեյ Լավրովը ռազմական պատվիրակությամբ հունիսի 8-ին այցելելու է Թուրքիա։
Էմմա Չոբանյան
