Ընդդիմությունն «իգնորի» կենթարկվի, եթե նույն կերպ շարունակի. Արայիկ Հարությունյան․ ՏԵՍԱՆՅՈՒԹ

«Իրողություններն ընդունում ենք ի գիտություն. ինչպես փակ, այնպես էլ բաց դռների հետևում քննարկվում են առօրյա հարցեր. կառավարությունը հրապարակային է իր գործողություններում »,- այս մասին ԱԺ-ում լրագրողների հետ զրույցում նշեց ՀՀ վարչապետի աշխատակազմի ղեկավար Արայիկ Հարությունյան անդրադառնալով դիտարկմանը, որ ընդդիմությունը մեկ ամսից ավելի է՝ բողոքի ակցիաներ է կազմակերպում՝ պահանջելով վարչապետի հրաժարականը:

Անդրադռանալով դիտարկմանը, որ ընդդիմությունը հավաստիացումներ է ուզում լսել իշխանությունից, որ Արցախը երբեք չի լինելու Ադրբեջանի կազմում, Արայիկ Հարությունյանը պատասխանեց. «Եթե ընդդիմությունը գործընկերային է, ապա գործընկերային պատասխաններ կստանա: Եթե ընդդիմությունը պահանջներ է ներկայացնում և բարոյականության, քաղաքակրթության սահմաններից դուրս է գալիս, իհարկե, իշխանությունն իր բարձրությունից պետք է դրան պատասխանի, բայց, եթե շարունակում է նույն կերպ գործել, պարզապես մերժման, «իգնորի» կենթարկվի:

Նայեք, թե այդ ընդդիմությունն ինչպես էր իրեն պահում՝ ներխուժելով արտաքին գործերի նախարարության շենք և ինչպես էր իրեն պահում այն մարդկանց հետ, ովքեր բանակցում են նույն Արցախի խնդրի համար… Ընդդիմությունը թույլ է ու իր ազդեցությունն էլ թույլ է, այնուամենայնիվ, արտաքին քաղաքականության դաշտում խնդիրներ է ստեղծում տվյալ անձանց գործունեության հետ կապված»,-նշեց Հարությունյանը:

Նա նաև ընդգծեց, որ իշխանությունը հայտարարություններ է անում, երբ անհրաժեշտ է համարում, և ընդդիմությունը չի կարող իշխանությանը շեղել իր ծրագրերից: