Աղվան Վարդանյանը՝ Հովիկ Աբրահամյանի նմանությամբ

Հայ Յեղափոխական Դաշնակցության Հայաստանի Գերագույն մարմինն ընկեր Աղվան Վարդանյանին չներեց կուսակցության որոշմանը դեմ գնալու՝ Նիկոլ Փաշինյանի օգտին չքվեարկելու համար և հեռացրեց իր շարքերից: Մինչ այդ՝ պահանջելով վայր դնել պատգամավորի մանդատը, որը Վարդանյանը ստացել էր համամասնական ցանկով:

Աղվան Վարդանյանն առանց ըմբոստացման վայր դրեց մանդատը, բայց կուսակցությունից, կարծես, չէր սպասում, որ կհեռացնեն: Դա է վկայում ընկեր Աղվանի ՀՅԴ ԳՄ-ին ուղղված հայտարարությանը, որի փոքր տեքստի թերևս ամենաուշագրավ հատվածը հետևյալն է. «Սեփական տեսակետ ունեցողներին ժողովուրդը, հավաքականությունները դժվար են հանդուրժում: Հետո ժամանակը պարզում է ջրերը. հեռացողները, երբեմն, վերադառնում են, հեռացնողները, երբեմն, մոռացվում»:

Աղվան Վարդանյանի ուշագրավ «նեղացկոտությունը» մտքի թելով կապվում է նախկին կոալիցիոն գործընկեր ՀՀԿ-ից հեռացած Հովիկ Աբրահամյանի՝ արձակ մտորումների հետ՝ նույն թեմայի շրջանակներում: Երբ վարչապետի պաշտոնից հեռացվելուց հետո կուսակցությունն ինքնակամ լքեց ՀՀԿ փոխնախագահ Հովիկ Աբրահամյանը, 2017թ. Հունվարի 26-ին, ՀՀԿ խորհրդի նիստի ժամանակ անդրադառնալով ՀՀԿ-ից հեռացողներին, Սերժ Սարգսյանն ասաց. «Մայր գետերն առաջընթաց են ապահովում իրենց հոսքի ողջ երկայնքով, կյանք են տալիս, հաց են տալիս, ջուր են տալիս, և այն առվակները, որոնք պոկվում են մայր գետից և կարճ ժամանակում նորից չեն մտնում նույն հոսքի մեջ, չորանում ու գնում են: Սա՛ է բնության օրենքը, և որևէ մեկը մեզնից չի կարող հակադրվել բնության օրենքներին, մենք կարող ենք փորձել կառավարել, կարգավորել, բայց, ըստ էության, այսպես է լինելու…»:

Մեկ օր անց Հովիկ Աբրահամյանը ֆեյսբուքում գրեց. «Չմոռանանք նաև, որ մայր գետերը ոչ այլ ինչ են, քան ինքնամոռաց առվակների միավորում: Բայց ինչ-որ պահից գետ լցվող տեխնոլոգիական գործարանի խառնուրդային ջրերը կմխտռեն ողջ մայր հունը, անպիտան կդառնա ամբողջը: Միգուցե մինչ այդ պոկված՝ դեռ սեփական հողի հոտը կրող առվակները, մինչև ոչնչանալը, հասցնե՞ն գոնե մեկ-երկու բնակավայրի կյանք պարգևել»:

ՀՀԿ առվակը դեռ որևէ բնակավարի կյանք չի պարգևել, իսկ թե ինչ կանի Դաշնակցության առվակը, ժամանակը ցույց կտա:

Թ․ Խ․