Կան տարաձայնություններ Բաքվի հետ, դրա համար էլ բանակցություններ են ընթանում. Արմեն Գրիգորյան․ ՏԵՍԱՆՅՈՒԹ

Սահմանին ցանկացած լարում բացասաբար է ազդում բոլոր գործընթացների վրա: Այս մասին Կառավարության նիստից հետո կայացած ճեպազրույցում հայտնեց ՀՀ անվտանգության խորհրդի քարտուղար Արմեն Գրիգորյանը:

«Դա է եղել նաև պատճառը, որ սահմանազատման և սահմանագծման գործընթացները սկսելուց առաջ առաջարկում էինք, որ հայելային տարբերակով զորքերը հետ քաշվեն, որպեսզի սահմանին կայունություն լինի: Սահմանային անվտանգությունը շարունակում է մնալ օրակարգում: Մենք կքննարկենք, և, հուսով ենք՝ լուծումներ կգտնենք, որպեսզի սահմանին լարումներ չլինեն»,- ասաց Գրիգորյանը:

Ինչ վերաբերում է տարաձայնություններին Անվտանգության խորհրդի քարտուղարը նշեց, որ հայկական կողմը փորձում է հնարավորինս թափանցիկ գործել և հանրությանը տեղեկացնել այն մասին, ինչ քննարկվում է:

Նրա խոսքով՝ բանակցություններ տեղի են ունենում նաև այն պատճառով, որ Երևանի և Բաքվի մոտեցումներում կան տարաձայնություններ: «Մենք հույս ունենք, որ բանակցությունների միջոցով կհաղթահարվեն այդ տարաձայնությունները»,- ընդգծեց Գրիգորյանը:

Անդրադառնալով Արցախի կարգավիճակի վերաբերյալ հարցին՝ Գրիգորյանն ընդգծեց. «Արցախի անվտանգության և ժողովրդի իրավունքների հարցից պետք է բխի կարգավիճակը»:

«Մենք շարունակում ենք կարևորել Արցախում ապրող մեր հայրենակիցների անվտանգությունը և իրավունքները, որից էլ պետք է բխի կարգավիճակը: Համոզված ենք, որ հենց իրավունքներն ու անվտանգությունն են որոշելու կարգավիճակը: Շարունակելու ենք աշխատել այս ուղղությամբ և համոզված ենք, որ այս ուղղությամբ աշխատելով՝ մենք արդյունքներ ենք ունենալու»,- նշեց Գրիգորյանը:

Անդրադառնալով դիտարկմանը, որ Թուրքիայի նախագահ Ռեջեփ Թայիփ Էրդողանի հետ հեռախոսազրույցում, ըստ լրատվամիջոցների, Ալիևը հայտնել էր, որ բրյուսելյան հանդիպմանը պայմանավորվել են «Զանգեզուրի միջանցքի» բացման շուրջ , Գրիգորյանը նշեց. «Բանակցոությունները տեղի են ունենում Բրյուսելում, և Բրյուսելից եղել է պարզաբանում, որ միջանցքային տրամաբանությամբ որևէ քննարկում չի եղել: Ի դեպ, սրա մասին նաև Մոսկվայի մեր գործընկերներն են ժամանակին հայտարարել: Հենց նոյեմբերին փոխվարչապետ Օվերչուկի կողմից հայտարարություն է եղել, որտեղ նա նշել է, որ միջանցքային տրամաբանության որևէ հարց չի քննարկվում:

Իհարկե, Ադրբեջանը բանակցություններին չհամապատասխանող հայտարարություններ է անում, բայց մենք կարող ենք հստակ ասել, որ մենք ինչ բանակցում ենք՝ հրապարակային կոմունիկացնում ենք»:

Մանրամասները՝ տեսանյութում: