12.01.2025 | 14:16
Առաջիկա օրերին օդի ջերմաստիճանն էապես չի փոխվի
ՄԻՊ-ում երեխաների և երիտասարդության խորհուրդ կձևավորվի. ՄԻՊ․ ՏԵՍԱՆՅՈՒԹ
Հասարակություն
02.06.2022 | 11:17
«Ցավոք սրտի, տեսանք դեպքեր, երբ ատելության խոսքը կարող է արտաբերվել նաև երեխաների շուրթերով, ինչը, կարծում եմ, դատապարտելի է»,- ԱԺ մշտական հանձնաժողովների համատեղ նիստում «Հայաստանի Հանրապետության 2021թ. պետական բյուջեի կատարման մասին» տարեկան հաշվետվության քննարկման ժամանակ այս մասին նշեց ԱԺ փոխնախագահ Հակոբ Արշակյանը՝ դիմելով ՄԻՊ Քրիստինե Գիգորյանին:
Պատգամավորը խնդրեց, որ այս հարցերը ՄԻՊ-ի ուշադրությունից չվրիպեն և համապատասխան արձագանք ստանան. «Պետք է հետևողական ջանքեր գործադրեն, որ երեխաները չօգտագործվեն ատելության խոսքի քարոզի մասով»:
ՄԻՊ-ը նշեց, որ երեխաների և երիտասարդների հետ իր շփումների արդյունքում լավ հիմք է տեսնում, երեխաներն իրենց իրավունքների վերաբերյալ տեղեկացված են, պահանջատեր ու խիզախ՝ առաջարկները ներկայացնելու առումով:
ՄԻՊ-ի խոսքով՝ առաջիկայում կհայտարարեն մարդու իրավունքների պաշտպանին առընթեր երեխաների ու երիտասարդության խորհուրդ ձևավորելու նախաձեռնության մասին, կլինի ընտրության գործընթաց:
«Ծաղիկներից, փուչիկներից անդին երեխաների իրավունքները բոլորի կողմից պետք է գիտակցված պաշտպանվեն: Ձեր կողմից վկայակոչված դեպքերը չեն վրիպել նաև մեր մոնիթորինգից: Այսօր մենք հայտարարություն ենք տարածել, օգտվել ենք բացված օրակարգից՝ մեկ անգամ ևս հիշեցնելու երեխայի լավագույն շահի մասին: Եվ մեր հայտարարության մեջ հստակ ենք ասել, որ երեխաների կարծիքի ազատ արտահայտման, գիտակցված, տեղեկացված հավաքներին մասնակցության իրավունքը, այո, բխում է լավագույն շահից: Բայց նաև պետք է հասկանանք, որ այդ լավագույն շահից է բխում, որ երեխաների մասնակցությունը չօգտագործվի մեծահասակների կողմից իրենց կարծիքը արտահայտելու համար: Այսինքն՝ դա պետք է լինի երեխայի տարիքին, հասունությանը համապատասխան տեղեկացված, գիտակցված մասնակցություն»,- նշեց Գրիգորյանը:
ՄԻՊ-ը նաև ընդգծեց, որ ակցիաներին երեխաների մասնակցությունը ցավալիորեն բերում է նրանց թիրախավորման, կիբերբուլինգի:
Մանրամասները՝ տեսանյութում:
