Բրյուսելում Ադրբեջանը հաստատել է՝ արտատարածքային պահանջներ չունի. Շառլ Միշել

ԵԽ նախագահ Շառլ Միշելը հայտարարել է, որ Բրյուսելում տարածաշրջանի ապաշրջափակման համատեքստում ՀՀ-ն ու Ադրբեջանը հաստատել են, որ ապագա տրանսպորտային ենթակառուցվածքների հետ կապված արտատարածքային պահանջներ չունեն։

«Կապի հնարավորությունները հատուկ քննարկվել են մայիսի 22-ին Բրյուսելում՝ տարածաշրջանի ապաշրջափակման հնարավորությունները զարգացնելու նպատակով: Այս համատեքստում երկու կողմերը հաստատել են, որ ապագա տրանսպորտային ենթակառուցվածքների հետ կապված արտատարածքային պահանջներ չկան: Հակառակի շահարկումները ցավալի են»,- ասված է ԵԽ նախագահ Շառլ Միշելի տարածած հայտարարության մեջ։

Տեղեկացվում է, որ Հայաստանի և Ադրբեջանի միջև վերջին օրերի լարվածության համատեքստում ԵՄ-ն վերահաստատել է իր հանձնառությունը՝ խորացնել համագործակցությունը երկու երկրների հետ՝ զարգացնելու Հարավային Կովկասը, որը կլինի անվտանգ, կայուն, խաղաղ և բարգավաճ՝ ի շահ տարածաշրջանում ապրող բոլոր մարդկանց:

Միշելը ողջունել է մայիսի 24-ին երկու երկրների սահմանային հանձնաժողովների առաջին պատմական հանդիպումը և ընդգծել Հայաստանի և Ադրբեջանի միջև պետական ​​սահմանի երկայնքով կայունության և անվտանգության ապահովման կարևորությունը։

ԵԽ նախագահն ընդգծել է,որ Հայաստանի և Ադրբեջանի միջև հարաբերությունների կայուն կարգավորման համար կարևոր է լուծել բոլոր առկա խնդիրները, ներառյալ ապագա խաղաղության պայմանագրի շուրջ քննարկումներն առաջ մղելն ու հակամարտության արմատական ​​պատճառները: Նախագահ Միշելի կարծիքով, բոլոր հիմնական խնդիրները, որոնք հանգեցրել են Լեռնային Ղարաբաղի առաջին պատերազմին, ինչպես նաև 2020 թվականին ռազմական գործողությունների վերսկսմանը, պետք է լուծվեն բոլոր շահագրգիռ կողմերի կողմից՝ կայուն և արդար խաղաղության համար պայմաններ ստեղծելու համար:

«Ինչպես ցանկացած ժառանգված հակամարտության դեպքում, տերմինաբանությունը հատկապես զգայուն է այս համատեքստում: Նախագահ Միշելի հայտարարությունը մայիսի 22-ին կայացած առաջնորդների հանդիպման արդյունքների վերաբերյալ չպետք է մեկնաբանվի որպես քննարկումների նախապես որոշված ​​արդյունքի դրսևորում: Ամենակարևորը, ի վերջո, այն է, որ բոլոր խնդիրները համակողմանիորեն լուծվեն. սա ներառում է ողջ բնակչության իրավունքներն ու անվտանգությունը»,-ասված է հայտարարության մեջ:

Նախագահ Միշելը շեշտել է նաև բնակչությանը խաղաղության նախապատրաստելու անհրաժեշտությունը և այս հարցում հանրային հռետորաբանության կարևոր դերը:

Տեղեկացվում է, որ ԵՄ հատուկ ներկայացուցիչ Կլաարը մոտ օրերս կմեկնի տարածաշրջան: