19.08.2026 | 09:33
ՀՀ տարածքում ավտոճանապարհներն անցանելի են
Վարդան Օսկանյանին քննիչ հանձնաժողով հրավիրելու ծանուցում է ուղարկվել, ցանկում նաև Ժիրայր Լիպարիտյանն է
Քաղաքականություն
27.05.2022 | 12:07
Factor.am-ի տեղեկություններով 44-օրյա պատերազմի հանգամանքերն ուսումնասիրող Ազգային ժողովի քննիչ հանձնաժողովը որոշել է հունիսի ընթացքում հանձնաժողով հրավիրել Հայաստանի արտաքին գործերի նախկին նախարար Վարդան Օսկանյանին և ԱԳ նախարարի նախկին տեղակալ Ժիրայր Լիպարիտյանին:
Այս տեղեկությունը մեզ հետ զրույցում հաստատեց ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը: Նրա փոխանցմամբ՝ հրավերը Վարդան Օսկանյանին արդեն ուղարկվել է, հանձնաժողովը ճշտում է Լիպարիտյանի հասցեն, որպեսզի նրան ևս հրավեր ուղարկի: Փորձեցինք մեկնաբանություն ստանալ Վարդան Օսկանյանից՝ արդյո՞ք ներկայանալու է հանձնաժողով, սակայն, նա մեր հեռախոսազանգերն անպատասխան թողեց:
Հիշեցնենք՝ Factor.am-ն ավելի վաղ հայտնել էր, որ քննիչ հանձնաժողովը որոշել է պատերազմի հանգամանքները երկու փուլով ուսումնասիրել՝ անդրադառնալով նախ բանակցային, ապա՝ ռազմական գործողությունների ընթացքին:
Նշենք, որ Վարդան Օսկանյանը Ռոբերտ Քոչարյանի, իսկ Ժիրայր Լիպարիտյանը Լևոն Տեր-Պետրոսյանի իշխանության տարիներին ներգրավված են եղել արցախյան հիմնախնդրի կարգավորման բանակցային գործընթացներում: Քննիչ հանձնաժողովի անդամ ՔՊ-ական Արմեն Խաչատրյանը մի քանի օր առաջ Factor.am-ի հարցին ի պատասխան չէր բացառել, որ հանձնաժողով կհրավիրվեն նաև Հայաստանի նախկին նախագահները:
Նարեկ Կիրակոսյան
