ՀՀ-Ադրբեջան սահմանին տեղի կունենա սահմանագծման հարցով համատեղ հանձնաժողովների առաջին հանդիպումը․ Շառլ Միշել․ ՏԵՍԱՆՅՈՒԹ

Եվրոպական խորհրդի նախագահ Շառլ Միշելը ՀՀ վարչապետ Նիկոլ Փաշինյանի ու Ադրբեջանի նախագահ Իլհամ Ալիեւի հետ  եռակողմ հանդիպումից հետո հանդես է եկել հայտարարությամբ։ Միշելը նշել է, որ հանդիպումը եղել է արդյունավետ։

«Մանրամասնորեն քննարկվել են մարդասիրական հարցերը, այդ թվում՝ ականազերծումը, ձերբակալվածների ազատ արձակումը ու անհետ կորածների ճակատագրի լուծմանն ուղղված ջանքերը»,- ասել է Շառլ Միշելը:

Անդրադառձնալով սահմանային խնդիրներին՝ եվրոպացի պաշտոնյան հայտնել է, որ առաջիկա օրերին միջպետական սահմանին տեղի կունենա սահմանային հանձնաժողովների առաջին համատեղ նիստը։

«Սահմանների հարցով համատեղ հանձնաժողովների առաջին հանդիպումը տեղի կունենա միջպետական սահմանին առաջիկա օրերին, կքննարկվեն սահմանագծման և սահմանային անվտանգությունը լավագույնս ապահովելու հետ կապված բոլոր հարցերը», – հայտարարել է Միշելը:

Անդրադառնալով հաղորդակցությունների ապաշրջափակման վերբաերյալ ձեռքբերումներին՝ վերջինս նշել է, որ համաձայնություն է ձեռք բերվել տարանցման կարգավորման սկզբունքների վերաբերյալ։

«Ղեկավարները համաձայնության են եկել տարանցման կարգավորման սկզբունքների վերաբերյալ՝ արևմտյան Ադրբեջանի և Նախիջևանի, Ադրբեջանի տարածքով՝ Հայաստանի տարբեր մասերի, ինչպես նաև թե ինչ սկզբունքով են իրականացվելու միջազգային փոխադրումները երկու երկրների հաղորդակցության ուղիների և ենթակառուցվածքների միջոցով։ Հատկանշական է, որ նրանք համաձայնության են եկել սահմանային վարչարարության, անվտանգության սկզբունքների և միջազգային տարանցումների տուրքերի շուրջ։ Եվ փոխվարչապետերն այս պայմանավորվածությունները առաջ կտանեն առաջիկա օրերին», – նշել է Միշելը:

Անդրադառնալով խաղաղության պայմանագրին՝ Եվրոպական խորհրդի ղեկավարը նշել է, որ երկու երկրների ղեկավարները պայմանավորվել են շարունակել Հայաստանի և Ադրբեջանի միջև ապագա խաղաղության պայմանագրի շուրջ քննարկումները, որով պետք է կարգավորվեն երկու երկրների միջև միջպետական հարաբերությունները։ «Ես ընդգծեցի երկու կողմի համար, որ իմ համոզմամբ՝ անհրաժեշտ է, որ Ղարաբաղի էթնիկ հայ բնակչության իրավունքներին ու անվտանգությանը ևս անդրադարձ կատարվի», – ասել է նա:

Անդրադառնալով Սոցիալ-տնտեսական զարգացմանը՝ Շառլ Միշելը նշել է, որ ԵՄ-ն պատրաստ է ուժեղացնել իր աջակցությունը բնակչությունը երկարաժամկետ կայուն խաղաղության նախապատրաստելու հարցում։

«Մենք պայմանավորվել ենք սերտ կապի մեջ մնալ ու կրկին նույն ձևաչափով հանդիպել հուլիս-օգոստոս ամիսներին», – եզրափակել է Շառլ Միշելը:

Տաթև Ֆռանգյան