Քաղաքականություն
20.05.2022 | 12:40Երկօրյա պաշտոնական այցով Հայաստան է ժամանել Լիտվայի Հանրապետության նախագահ Գիտանաս Նաուսեդան տիկնոջ՝ Դիանա Նաուսեդիենեի հետ:
Հայաստանի Հանրապետության նախագահ Վահագն Խաչատուրյանը և Լիտվայի Հանրապետության նախագահ Գիտանաս Նաուսեդան հանդես են գալիս համատեղ հայտարարությամբ։
«Լիտվայի նախագահ Գիտանաս Նաուսեդայի հետ քննարկել ենք տարածաշրջանում երկարաժամկետ խաղաղության հաստատմանն ուղղված Հայաստանի ջանքերը»,- այս մասին ճեպազրույցի ժամանակ հայտնեց ՀՀ նախագահ Վահագն Խաչատուրյանը։
«Հայաստանի և Լիտվայի դիրքորոշումներն այս հարցում նույնական են»,- ասաց նախագահը՝ հավելելով, որ Լիտվայի նախագահը խոստացել է ամեն կերպ աջակցել Արցախում և Ադրբեջանի վերահսկողության տակ անցած տարածքներում հայկական քրիստոնեական ժառանգության պահպանմանը. այդ համատեքստում ընդգծվել է ՅՈՒՆԵՍԿՕ-ի փորձագիտական առաքելության՝ Արցախ և Ադրբեջանի վերահսկողության տակ անցած տարածքներ այցի կարևորությունը:
Խաչատուրյանը բարձր գնահատեց պատմական կապերի վրա հիմնված հայ-լիտվական երկկողմ հարաբերությունների զարգացումը: Նախագահի խոսքով՝ հանդիպման ընթացքում քննարկվել են արդյունաբերության, ՏՏ, գյուղատնտեսության, կրթության և այլ ոլորտներում հարաբերությունների խորացման, ինչպես նաև ապրանքաշրջանառության ավելացման հնարավորությունները։
Խաչատուրյանը հավելեց, որ հանդիպման ընթացքում անդրադարձ է կատարվել նաև ՀՀ-ԵՄ գործընկերություն օրակարգին և դրա շրջանակներում իրականացվող ծրագրերին:
Մանրամասները՝ տեսանյութում։
