Ընդդիմությունը կոշտ է խոսում Արևմուտքի հետ, ադեկվատ չէ գլոբալ իրավիճակին, իշխանությունը՝ ևս․ Սարո Սարոյան․ ՏԵՍԱՆՅՈՒԹ

ՀՅԴ-ական Իշխան Սաղաթելյանը ՀՀ-ում ԱՄՆ-ի դեսպանին մեղադրել է երկակի ստանդարտների մեջ, թե նա լռում է Նիկոլ Փաշինյանի բռնապետության մասին։ Դեսպան Լին Թրեյսին «Արմենպրես»-ին տված հարցազրույցում ասել է, որ ԱՄՆ-ն հանձնառու է՝ աջակցել ՀՀ-ի ժողովրդավարական և տնտեսական բարեփոխումներին, և հանձնառու է կառուցել այնպիսի ապագա, որի հիմքում ժողովրդավարական արժեքներն են և այն ճանապարհը, որ ընտրեց հայ ժողովուրդը 2018-ին և վերահաստատեց 2021-ի խորհրդարանական ընտրությունների ժամանակ։ Բացի այդ, Ամերիկայի Հայ դատի հանձնախումբը դիմել է ԱՄՆ նախագահ Ջո Բայդենին՝ դեսպան Թրեյսիին հետ կանչելու և նոր դեսպանով փոխարինելու պահանջով։

Արդյո՞ք իշխանության գալ հավակնող ընդդիմադիր այս ուժը ճիշտ է հաշվարկել ապագա աշխարհաքաղաքական զարգացումները՝ մեղադրանքներ հնչեցնելով ԱՄՆ-ի ուղղությամբ նաև Ղարաբաղի հարցում, երբ ուկրաինական պատերազմում ՌԴ-ն մեծ կորուստներ է կրում, և անհաջողություն է կանխատեսվում, որի հետևանքով, գուցե, ավելի մեծանա ԱՄՆ-ի դերը Հարավային Կովկասում։

Քաղաքագետ Սարո Սարոյանը Factor TV-ի հարցազրույցում այս հարցին պատասխանելով՝ նշում է․ «Ինչպես ներկա վարչախումբն ադեկվատ չէ աշխարհաքաղաքական զարգացումներին և դրանց հետևանքներն է կրում, նույնը նաև ընդդիմությանն է վերաբերվում։ Ընդհանրապես անադեկվատ են՝ ոչ մի ծրագիր չեն ներկայացրել, ոչ մի քայլերի շարք չեն ներկայացրել, թե ինչպես են իշխանափոխություն իրականացնելու, և չեն նշում, որովհետև չգիտեն, թե ինչպես են դա անելու։ Շարքը կարելի է շարունակել»։

Իսկ ինչո՞վ պայմանավորել ընդդիմության որդեգրած կուրսը՝ ռուսական շեշտադրումներով և Արևմուտքին ուղղված քննադատությամբ։

«Իրենց այս ակտիվությունը պայմանավորված է արտաքին գործոններով։ Արևմուտքի հետ կոշտ խոսակցության կուրսով և պրոռուսական ուղղվածության ընդգծելով, առաջ գնալով՝ իրենք չեն հասկանում, որ դա անհամահունչ վարք է աշխարհաքաղաքական իրավիճակի հետ»,- ասում է քաղաքագետը։

Հարցազրույցն ամբողջությամբ՝ տեսանյութում։

Ռոբերտ Անանյան