Ալիևը հայտարարել է, որ Հայաստանը, իբր, չեղարկել է սահմանների դելիմիտացիայի հարցով ծրագրված հանդիպումները

Ադրբեջանի նախագահ Իլհամ Ալիևը կրկին դժգոհել է պաշտոնական Երևանից ու նշել, որ Հայաստանը, իբր, հրաժարվել  է սահմանների դելիմիտացիայի հարցով հանդիպումից, գրում են ադրբեջանական լրատվամիջոցները։

«Ադրբեջանը ժամանակին ստեղծեց աշխատանքային խումբը և պատրաստ էր պատվիրակություն ուղարկել։ Դա համաձայնեցված էր հայկական կողմի հետ։ Ի դեպ, Հայաստանի ԱԳՆ-ն է առաջարկել սահմանի հետ կապված առաջին հանդիպումն անցկացնել։ Ադրբեջանն ընդունել է այդ առաջարկը, և մենք պատրաստ ենք եղել պատվիրակություն ուղարկել։ Սակայն վերջին օրը՝ ապրիլի 29-ին, Հայաստանը չեղարկեց արդեն իսկ համաձայնեցված հանդիպումը, ինչը շատ հիասթափեցնող էր։ Է՛լ ավելի հիասթափեցնող էր, կրկին  Հայաստանի առաջարկով, մայիսի 7-11-ի նոր հանդիպման անցկացման մերժումը»,- ասել է Ալիևը նախօրեին Լիտվայի նախագահի հետ բանակցություններից հետո։

Նա նշել է, որ Բաքուն Երևանից նոր ցանկացած ժամկետի է սպասում աշխատանքների մեկնարկի համար։

«Չնայած որոշակի լավատեսությանը՝ Հայաստանի կառավարության նման շարժերն ու շատ տարօրինակ քայլերն իրականում   խաթարում են գոյություն ունեցող որոշակի վստահությունը»,- ասել է Ալիևը։

Հավելենք, որ նախօրեին հարցազրույցում ՀՀ ԱԳ նախարար Արարատ Միրզոյանը հայտարարել է, որ հանդիպման կազմակերպման քննարկումները շարունակվում են։

«Հանդիպումը չի կայացել, սակայն կարող եմ վստահեցնել, որ մենք կշարունակենք այս հանդիպումը կազմակերպելու շուրջ մեր քննարկումները։ Կան որոշակի տեխնիկական մանրամասներ, որոնք կողմերը պետք է համաձայնեցնեն: Եվ հուսով եմ, որ առաջիկա օրերին կամ շաբաթներին հանդիպումը, ի վերջո, կկայանա»,- ասել է Միրզոյանը։

Էմմա Չոբանյան