Ինչպե՞ս է ստացվում, որ ցույցերի առաջին շարքերում կանայք և ծերեր են. Արա Ֆիդանյան․ ՏԵՍԱՆՅՈՒԹ

«Որևէ ոստիկան անտեղի չի հարվածի և անտեղի որևէ ծայրահեղ միջոցի չի դիմի»,- այս մասին ԱԺ-ում լրագրողների հետ զրույցում նշեց Հայաստանի փոխոստիկանապետ Արա Ֆիդանյանը՝ հավելելով, որ ինքնին բերման ենթարկելը ենթադրում է որոշակի ուժի կիրառում, քանի որ քաղաքացները բերման ենթարկվելիս ամեն կերպ դիմադրում են ոստիկաններին:

Ֆիդանյանի խոսքով՝ հատուկենտ դեպքեր են եղել, երբ ոստիկանությունն անհամաչափ ուժ է կիրառել: «Այս պահի դրությամբ՝ 31 ծառայողական քննություն է իրականացվում ոստիկանության տարբեր ծառայողների կողմից որոշ գործողությունների առնչությամբ , նաև 20 գործերով նախապատրաստվում են նյութեր, և 2 քրեական գործ արդեն հարուցված է՝ ոստիկանների գործողությունների առնչությամբ, երկուսն էլ հարվածելու հետ են կապված»,- նշեց փոխոստիկանապետը:

Ֆիդանյանը հավելեց, որ այս ողջ ժամանակահատվածում ոստիկանությունը հիմնականում գործել է բարձր պրոֆեսիոնալիզմով, ցուցաբերել է գրագետ ծառայություն:

«Պետք է հաշվի առնել այն էմոցիոնալ ֆոնը, որն առկա է; Երեկ ականատես եղանք իրավիճակի, որ որոշ անձինք, օգտվելով իրենց կարգավիճակից, խոչընդոտում էին ոստիկանության օրինական գործողությունները:

Պետք է հաշվի առնել նաև, որ ոստիկանները կատարում են գերլարված ծառայություն և այդ ընթացքում արհեստական խոչընդոտները բավականին շատ են: Ընդամենը մեկ օրինակ ներկայացնեմ, արդյոք որևէ մեկի մտքով չի անցել, թե ինչպես է ստացվում, որ ցուցարարների առաջին շարքերում հայտնվում են կանայք, պատգամավորները և ծերերը: Բնականաբար այս առումով ոստիկանության գործողություններն ինքնըստինքյան սահմանափակվում են»,- ասաց Ֆիդանյանը:

Մանրամասները՝ տեսանյութում։