Հղի կնոջը վրաերթի ենթարկած ոստիկանը կրկին ազատ արձակվեց. դատարանը մերժեց կալանքի միջնորդությունը

Երևան քաղաքի ընդհանուր իրավասության դատարանը՝ դատավոր Ռազմիկ Մարիկյանի նախագահությամբ, երեկ ուշ գիշեր որոշում է կայացրել խափանման միջոց կալանք չկիրառել Ոստիկանության մայոր Արամ Նավասարդյանի նկատմամբ և նրան կրկին ազատ արձակել՝ ստորագրություն չհեռանալու մասին միջոց ընտրելով։ Փաստացի, քննիչի որոշումը դատարանը թողեց անփոփոխ։ Այս մասին Factor.am-ի հետ զրույցում տեղեկացրեց Քննչական կոմիտեի մամուլի քարտուղար Վարդան Թադևոսյանը։

Հիշեցնենք՝ հենց Արամ Նավասարդյանն էր եղել ապրիլի 26-ին Պարոնյան-Լեո խաչմերուկում վարչապետի ավտոշարասյանն ուղեկցող ոստիկանական մեքենայի ղեկին։ Ժամը 18:20-ի սահմաններում նրա վարած Տոյոտան վրաերթի էր ենթարկել 28-ամյա հղի կնոջը, կինը մահացել էր, չէր հաջողվել փրկել նաև պտղի կյանքը: Դեպքի առթիվ քրեական գործ է հարուցվել Քրեական օրենսգրքի 242-րդ հոդվածի 2-րդ մասով և 244-րդ հոդվածի 1-ին մասով, այսինքն՝ համապատասխանաբար՝ ճանապարհային երթևեկության անվտանգության ապահովմանն ուղղված պահանջները խախտելը, որն անզգուշությամբ առաջացրել է մարդու մահ և ճանապարհատրանսպորտային պատահարի վայրը լքելը:

Նավասարդյանն առաջին անգամ ձերբակալվել էր ապրիլի 27-ին, սակայն՝ ազատ արձակվել մեկ օր անց։ Մայիսի 2-ին քրեական գործի նկատմամբ հսկողություն իրականցնող դատախազը որոշում է կայացրել Նավասարդյանի նկատմամբ ՀՀ քրեական օրենսգրքի 244-րդ հոդվածի 1-ին մասով քրեական հետապնդում չիրականացնելու մասին և վերջինիս նկատմամբ որպես խափանման միջոց ընտրված ստորագրություն չհեռանալու մասին որոշումները վերացնելու մասին:

Հատկանշանական է, որ գործը հսկող դատախազը կոմիտեի քննիչից պահանջել է վերացնել այդ որոշումները, քննել նաև վարորդի՝ դեպքի վայրը լքելու հանգամանքը և կալանավորման միջնորդության հարցը քննարկել։ Այնինչ, դատախազի գրավոր ցուցումների վերաբերյալ վարույթն իրականացնող մարմինն առարկություն է ներկայացրել, որը դատախազի կողմից մերժվել է: Նախօրերին Նավասարդյանը կրկին ձերբակալվել էր, մեղադրանքը՝ լրացվել, կալանքի միջնորդություն ներկայացվել դատարանը, որը, փաստացի, մերժվել է։

Ռոզա Վարդանյան