Դիրքում անշնչացած հայտնաբերված Արգիշտիի հայրը գիշերն է հեռախոսով խոսել որդու հետ․ որևէ արտառոց բան չի նկատել 

Հայտնել էինք, որ հանրապետության արևելյան ուղղությամբ տեղակայված դիրքերից մեկում այսօր հայտնաբերվել է 20-ամյա ժամկետային զինծառայող, շարքային Արգիշտի Արմենի Եղյան դին՝ կրծքավանդակի շրջանում հրազենային վնասվածքով։ Արգիշտին Սյունիքի մարզի Շաքի համայնքից էր։ Համայնքապետ Ռուբեն Մանուչարյանը, որը նաև նրանց ընտանիքի բարեկամն է, Factor.am-ի հետ զրույցում ասաց, որ Արգիշտիի հետ վերջին անգամ խոսել էին մայիսի 9-ին՝ տեսակապով։

«Բարձր տրամադրություն ուներ, ժպիտը դեմքին, կենսուրախ, բոլորի հետ խոսեց, ամեն ինչ շատ լավ էր իր մոտ»,- պատմեց համայնքապետը։

Արգիշտին զորակոչվել էր  1,5 տարի առաջ, ծառայում էր Վարդենիսի զորամասերից մեկում։ Համայնքապետի տեղեկություններով՝ զինվորը զորամասում որևէ մեկի հետ կոնֆլիկտ չուներ։

«Շատ խաղաղ բնավորություն ուներ, բարի, բազմակողմանի զարգացած, սովորում էր Երևանի պետական համալսարանում, անգլերեն և իտալերեն լեզուների մասնագետ էր: Ինքը գերզարգացած երիտասարդ էր, օրինակելի վարքի տեր, իր բացառիկ ընդունակությունների շնորհիվ համալսարանը նրան մեկ տարով ԱՄՆ էր ուղարկել»,- մանրամասնեց Մանուչարյանը։

Արգիշտիի հայրը ևս հեռախոսով այս գիշեր խոսել է որդու հետ  և որևէ արտառոց բան չի նկատել։

Պաշտպանության նախարարությունից տեղեկացնում են՝ դեպքի մանրամասները լիարժեք պարզելու համար քննություն է տարվում։ 

Արփի Հակոբյան