«Գործը վարույթ ենք ընդունել, ծանոթացման փուլում է». Քյարամյանը՝ Փաշինյանին որպես մեղադրյալ ներգրավելու հավանականության մասին

Մովսես Հակոբյանի հայտարարությունների հիման վրա հարուցված քրեական գործը Քննչական կոմիտեն վարույթ է ընդունել։ ՔԿ նախագահ Արգիշտի Քյարամյանը լրագրողների հետ զրույցում հայտնեց,որ քրեական գործը դատախազության նախաձեռնությամբ տեղափոխվել է Կոմիտե։ Անդրադառնալով քրեական գործում վարչապետ Նիկոլ Փաշինյանին որպես մեղադրյալ ներգրավելու պահանջներին՝ Քյարամյանը նշեց.

«Գործն ընդունվել է վարույթ, այժմ զինվորական քննչական վարչությունում ծանոթանում են գործին: Պետք է ծանոթանանք, ըստ այդմ, գործի քննությունը կընթանա: Այս պահին դրա հետ կապված ոչինչ չեմ կարող ասել, որովհետև այն դեռ ծանոթացման փուլում է գտնվում»:

Հարցին, թե ճիշտ չէ՞ «կարող էինք կանխել պատերազմը, կունենայինք այս վիճակը, բայց առանց զոհերի» արտահայտության համար Նիկոլ Փաշինյանի նկատմամբ գործ հարուցել ու իրեն կանչել հարցաքննության, ՔԿ ղեկավարն արձագանքեց.

«Գործը պետք է քննվի օբյեկտիվ, լրիվ և բազմակողմանի: Քննության ընթացքում պետք է պարզաբանվեն բոլոր հանգամանքները: Այս պահին ավելի բան չեմ կարող ասել»։

Հիշեցնենք՝ օրեր շարունակ զոհված զինծառայողների հարազատները բողոքի ակցիա էին իրականացվում Գլխավոր դատախազության դիմաց։ Նրանք պահանջ էին ներկայացրել՝ վարչապետ Նիկոլ Փաշինյանին քրեական գործով որպես մեղադրյալ ներգրավել, իսկ իրենց՝ զոհված զինծառայողների ծնողներին, այդ քրեական գործով տուժող ճանաչել։ Վերջիններիս վրդովեցրել է շաբաթներ առաջ Ազգային ժողովի ամբիոնից վարչապետի հայտարարությունն այն մասին, թե պատերազմը կանխել հնարավոր էր։

Պահանջի հաջորդ օրը գերատեսչությունը հաղորդագրություն էր տարածել ըստ որի՝ ներկայացրած պահանջների համար իրավական ընթացակարգ է ապահովվել։ Մասնավորապես, քրեական գործով որպես տուժող ճանաչելու վերաբերյալ զոհված զինծառայողների մի շարք ծնողների, հարազատների միջնորդությունը բավարարվել է:

Ռոզա Վարդանյան