Ընդդիմադիրների հանրահավաքը Գյումրիում ավարտվեց․ ԼՈւՍԱՆԿԱՐՆԵՐ

Գյումրու Թատերական հրապարակում այսօր տեղի է ունեցել ընդդիմադիր ուժերի հանրահավաքը։ Ինչպես արդեն հայտնել էինք, այն մեկնարկել էր ուշացումով։ Բանն այն է, որ ըննդիմադիրների երթը Հոռոմ գյուղի խաչմերուկում արգելակվել էր, քանի որ շիրակցի գերիների մի խումբ հարազատներ փակել էին ճանապարհը՝ թույլ չտալով ավտոշարասյան տեղաշարժը։

Հանրահավաքում ելույթ ունեցողներից գրեթե բոլորն անդրադարձան այս թեմային։ Շիրակի նախկին մարզպետ, դաշնակցական Արթուր Խաչատրյանն իր ելույթում ասաց․ «Ուզում եմ անդրադառնալ մեր այն հայրենակիցների պահանջներին, որոնք մեզ հետ այսօր զրույցի էին բռնվել, այդպես ձևակերպեմ։ Ուզում եմ հիշեցնել այս նույն իշխանությունների դիրքորոշումը գերիների խնդրի վերաբերյալ։

Հիշո՞ւմ եք, որ ասացին մեր եղբայրները չեն նեղանա, որ էլի մի երկու ամիս մնան թուրքի բանտերում, այդ իրենք էին, որ ասում էին գերիների հարցը համարում ենք փակված։ Հիմա այդ մարդկանց դժբախտությունը փորձում են շահարկե՞լ։ Փորձում են այդ մարդկանց խաբե՞ն, ասում են՝ եթե ուրիշները գան, այդ հարցն էլի չի լուծվի, որովհետև դրոշ են այրել և այլն։ Էդ մարդիկ թող իրենց խոստումը մի հատ կատարեն, հետո կարողանան ասեն՝ մեզ էլի ժամանակ տվեք, որ մենք հարց լուծենք»։

Ընդդիմադիրներըը խնդրեցին չօգտագործել գերիների հարազատների հուզական վիճակը ընդդիմության հանրահավաքները զսպելու համար։
ԱԺ ընդդիմադիր պատգամավոր Վահե Հակոբյանը Գյումրին անվանեց «հայ-ռուսական բարեկամության խորհրդանիշ քաղաք» և պնդեց՝ «այս խորհանիշերը, որ մեզանից փորձում են թուրքերը խլել, չի ստացվելու»։ Ըստ Վահե Հակոբյանի՝ իրենք կողմ են հարևանների հետ կայուն, զարգացած հարաբերություններ ունենալուն, երկարաժամկետ խաղաղությանը, սայան դա չպետք է լինի Հայաստանի տարածքային ամբողջության ու ինքնության հաշվին։

Արմիկ Մովսիսյան