16.07.2026 | 10:14
Արման Ծառուկյանը չի բացառել մասնակցությունն Օլիմպիական խաղերին
Անջեյ Կասպրշիկը ԼՂ հակամարտության հարցով հանդիպումներ է ունեցել ԱՄՆ Պետքարտուղարությունում
Քաղաքականություն
05.05.2022 | 13:08
ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկը նախօրեին հանդիպումներ է ունեցել ԱՄՆ Պետքարտուղարությունում։ Այս մասին գրում է ադրբեջանական «Թուրան»-ը։
Հայտնի է, որ Կասպրշիկը հանդիպել է ԱՄՆ պետքարտուղարի օգնական Քարեն Դոնֆրիդի հետ։ Լրատվամիջոցը նշում է, որ այլ հանդիպումների ու դրանց բովանդակության մասին չի հաղորդվում։
Հավելենք, որ վերջին շրջանում ամերիկացի և եվրոպացի դիվանագետները մեծ ակտիվություն են ցուցաբերում Լեռնային Ղարաբաղի հակամարտության կարգավորման հարցում։ Բացի այդ, օրերս Վաշինգտոնում Արցախյան հիմնախնդիրը ՀՀ ԱԳ նախարար Արարատ Միրզոյանը քննարկեց ԱՄՆ պետքարտուղար Էնթոնի Բլինքենի հետ։
Ի դեպ, նախօրեի ճեպազրույցում ԱՄՆ Պետքարտուղարության խոսնակ Նեդ Փրայսին հարց է ուղղվել նաև Կասպրշիկի հանդիպումների վերաբերյալ։
«ԵԱՀԿ գլխավոր դիտորդ Անջեյ Կասպրշիկն այս առավոտյան Պետքարտուղարությունում էր։ Կարծում եմ, որ նա հանդիպել է պետքարտուղարի օգնական Դոնֆրիդի հետ: Նրանք քննարկե՞լ են Լեռնային Ղարաբաղի հարցը կամ ԱՄՆ-ի ներգրավվածությունն այս կետում։ Գիտեմ, որ եվրոպացիների ու Վաշինգտոնի միջև կան որոշակի ջանքեր, և հավանաբար, եթե չեն սխալվում, այս շաբաթ կամ հաջորդ շաբաթ եղել են եվրոպացիների հետ այլ հանդիպումներ»,-հարցրել են Փրայսին։
Ի պատասխան՝ Պետքարտուղարության խոսնակը նշել է․ «Ես չգիտեմ՝ արդյո՞ք նրանք համաձայնել են լրացուցիչ հանդիպման շուրջ կամ քննարկել դա, բայց մենք կտեղեկացնենք, եթե ավելի շատ մանրամասներ ունենանք հայտնելու այդ հանդիպումից»։
Էմմա Չոբանյան
