«Իդիոտկա» բառի համար դատարանը Լենա Նազարյանին պարտավորեցրել է ներողություն խնդրել Թագուհի Թովմասյանից

Երևան քաղաքի ընդհանուր իրավասության դատարանը՝ դատավոր Սերգեյ Սահակյանի նախագահությամբ, պարտավորեցրել է «Քաղաքացիական պայմանագիր» կուսակցության պատգամավոր Լենա Նազարյանին ներողություն խնդրել «Հայաստան» դաշինքի պատգամավոր Թագուհի Թովմասյանից՝ «իդիոտկա» արտահայտության համար։ Այս մասին Factor.am-ը տեղեկանում է «Դատալեքս» դատական տեղեկատվական համակարգից։

Հիշեցնենք, որ նախորդ տարվա հուլիսի 3-ին ԱԺ-ի  պատգամավոր Թագուհի Թովմասյանը խորհրդարանի ամբիոնից խոսեց Աբովյանի դիահերձարանում գետնին նետված դիերի մասին՝ քննադատելով իշխանությանը, ինչին  այդ ժամանակ ԱԺ-ի  փոխնախագահի պաշտոնը զբաղեցնող Լենա Նազարյանը  կիսաձայն արձագանքեց, ասելով ՝ «իդիոտկա»։

Այս խոսքերից հետո ինչպես Թագուհի Թովմասյանը, այնպես էլ մի շարք պատգամավորներ Աժ ամբիոնից պահանջեցին Լենա Նազարյանից ներողություն խնդրել, սակայն նա հրաժարվեց դա անել, ինչից հետո Թովմասյանը դիմեց դատարան։

Դատարանը  Թագուհի Թովմասյանի հայցն ընդդեմ Լենա Ռաֆայելի Նազարյանի` վիրավորանք համարվող արտահայտության համար հրապարակայնորեն ներողություն խնդրելու և փոխհատուցում վճարելու պահանջների մասին, բավարարել մասնակի:

Դատավոր Սահակյանը պարտավորեցնել է Նազարյանին հրապարակային ներողություն խնդրել Թագուհի Մանվելի Թովմասյանից՝ Հայաստանի Հանրապետությունում գործող առնվազն 1000 տպաքանակ ունեցող հայալեզու մամուլում հետևյալ բովանդակությամբ տեքստի հրապարակում կատարելու միջոցով. «Ես՝ Լենա Ռաֆայելի Նազարյանս, 03․06․2021թ․ ՀՀ ԱԺ արտահերթ նիստի ընթացքում իմ կողմից Թագուհի Մանվելի Թովմասյանի հասցեին հնչեցված «իդիոտկա» վիրավորական արտահայտության համար ներողություն եմ խնդրում Թագուհի Մանվելի Թովմասյանից»։ Փոխհատուցում ստանալու մասով հայցը մերժվել է։

Նազարյանը մեկ ամիս ժամանակ ունի վճիռը վերաքննիչ ատյան բողոքարկելու համար, հակառակ դեպքում պետք է կատարի դատարանի որոշումը։

Ռոզա Վարդանյան