Այն, ինչ ձեռք բերեցինք, կարելի է շատ արագ կորցնել․ Արսեն Կարապետյանը՝ հետագա անելիքների մասին. ՏԵՍԱՆՅՈՒԹ

«Ուզում եմ տեսնել ստրատեգիական ծրագիր և ուղղություն, որով պետք է շարժվենք, ինձ այնքան էլ չի հետաքրքրում շարժման արագությունը։ Հասկանում եմ, որ միանգամից փոփոխությունների գնալը կարող է նույնիսկ կոլապսի տանել»,- Factor.am-ի հետ զրույցում նման տեսակետ է հայտնում ճարտարապետ Արսեն Կարապետյանը՝ անդրադառնալով ԱԺ պատգամավոր, «Քաղաքացիական պայմանագիր» կուսակցության ղեկավար Նիկոլ Փաշինյանի առաջնորդած ընդդիմադիր շարժմանը։

Նրա համոզմամբ՝ տեղի ունեցած հեղափոխությունը պատմության, ոգու պահանջ էր, անիվի պտույտ, անխուսափելի մի բան, որը պետք է տեղի ունենար։ Ճարտարապետը նշում է, որ քսան տարի տարբեր ոլորտի մասնագետների ձայնը լսելի չի եղել իշխանություններին և հույս է հայտնում, որ այդ իրողությունը կփոխվի․ «Այն, ինչ ձեռք բերեցինք, կարելի է շատ արագ կորցնել։ Մենք հիմա պետք է հասկանանք, որ երկրի կառավարումը մեր ձեռքերում է, բացի այդ՝ պետք է աշխատենք, որ մեր համքարությունները գոյանան նոր ձևով, եթե նախկինում, օրինակ՝ ճարտարապետներով կոմպրոմիսների էինք գնում և փորձում էինք ճանապարհ գտնել աշխատելու իշխանության հետ, հիմա պետք է կտրուկ քայլեր անել ու փոխել իրավիճակը»։

Հայաստանի երկրորդ նախագահ Ռոբերտ Քոչարյանը մեկնաբանություն է տվել ռուսաստանյան НТВ հեռուստաընկերությանը հայաստանյան վերջին զարգացումների կապակցությամբ և նշել, որ իշխանությունը ճամպրուկ չէ, որ վերցնես ու փոխանցես։ Այս առնչությամբ մեր զրուցակիցը նկատում է․ «Իշխանությունը ճամրուկի հետ համեմատելը առնվազն անհասկանալի է, դա և նմանատիպ որակումները դատարկ համեմատություններ են»։

Մանրամասները՝ տեսանյութում։

Աննա Բաբաջանյան