Այս ընդդիմությունը արհեստական երկարացնում է Փաշինյանի իշխանության կյանքը․ նույնն է՝ ճորտին ասես, որ նախկին համակարգը կվերականգնվի․ Արմեն Հովհաննիսյան․ ՏԵՍԱՆՅՈՒԹ

Factor TV-ի հարցազրույցը քաղաքական վերլուծաբան Արմեն Հովհաննիսյանի հետ

-Պարո՛ն Հովհաննիսյան, մեկ շաբաթից ավելի է՝ Ռոբերտ Քոչարյանի և Սերժ Սարգսյանի գլխավորած ընդդիմադիր ուժերը Երևանի փողոցներում բողոքի ակցիաներ են իրականացնում, օրակարգն էլ է հայտնի՝ «Նիկոլ Փաշինյանը հեռանա, մենք գանք իշխանության և Լեռնային Ղարաբաղի բանակցային հարցով ավելի լավ դիրքեր կապահովենք»։ Դուք ինչպե՞ս եք գնահատում ընթացող այս պրոցեսները։

-Պրոցեսը բոլորս ենք տեսնում։ Ես հենց սկզբից հոռետես եմ եղել դրա հաջողության հարցում, հաջողության՝ պրոցեսի մասնակիցների տեսակետից։ Ես կարծում եմ, որ չկա արտաքին քաղաքական օրակարգ իշխանության փոխվելու, որովհետև չկան լուրջ խաղացողներ աշխարհում, որոնց Նիկոլ Փաշինյանի քաղաքականությունը չբավարարի, ներառյալ՝ այն Ռուսաստանը, որին անընդհատ հղում է անում այս ընդդիմությունը։

–30 կետանոց հայտարարությո՞ւնը վկա։

-Առաջին հերթին՝ այո, բայց դա ընդամենը դրսևորումն է։ Հիմա աշխարհում միայն Լուկաշենկոն է և պարոն Փաշինյանն է, որ, օրինակ, ՆԱՏՕ-ի ընդլայնումը դատապարտում է՝ ըստ այդ հայտարարության։ Նույնիսկ այն երկրները, որոնք պրոռուսական քվեարկություն են ապահովում տարատեսակ միջազգային կազմակերպություններում, բացահայտ դրա մասին երբեք չեն ասել։ Դրա մասին բացահայտ ասում են պարոն Լուկաշենկոն, և այդ հայտարարության մեջ է բացահայտ ասված, որ ՆԱՏՕ-ի ընդլայնումը սխալ է, պատժամիջոցները միակողմանի սխալ են, այսինքն՝ այն ամենը, ինչ կապված է Ուկրաինայի հետ։

-Դա Հայաստանի և Ռուսաստանի ղեկավարությունների միջև, Ձեր կարծիքով, տարակարծությունների չլինելու փաստումն էր, բայց այս ուժերն առավել հայտնի են որպես ընդգծված ռուսամետ քաղաքականություն վարող ուժեր։ Արդյո՞ք կարելի է եզրակացնել, որ Մոսկվան, այնուհանդերձ, ուզում է ինչ-որ ճնշումներ գործադրել իշխանությունների վրա կամ ինչ-որ հարցում անհամաձայն է՝ Ղարաբաղի հարցում։

-Բոլոր դեպքում՝ հաշտության պայմանագիրը այնպես, ինչպես դա տեսնում են Ալիևը, Պուտինը, Էրդողանը, ամենևին միավորներ չի ավելացնում այն ղեկավարին, որը դա կստորագրի Հայաստանի կողմից։ Դա միանշանակ է։ Սա մի կողմից, իմ կարծիքով, երաշխիք է, որ Փաշինյանը հետ չի կանգնի պայմանավորվածություններից, երկրորդ՝ ես կարծում եմ, որ սա ճիգ է՝ լրացնելու ընդդիմադիր դաշտը, որովհետև պուտինյան ռեժիմի ամենամեծ գոյաբանական սարսափը «գունավոր հեղափոխություններն» են, այսինքն՝ պետք է «հակագունավոր հեղափոխություն»։

Հարցազրույցն ամբողջությամբ՝ տեսանյութում։

Ռոբերտ Անանյան