16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Եթե ընդդիմությունը մանդատները վայր դնի՝ խորհրդարանը չի լուծարվի. Վլադիմիր Վարդանյան. ՏԵՍԱՆՅՈՒԹ
Քաղաքականություն
03.05.2022 | 12:46
Եթե Ազգային ժողովի ընդդիմադիր երկու խմբակցությունների պատգամավորները իրենց մանդատները վայր դնեն, ոչինչ տեղի չի ունենա. խորհրդարանը չի լուծարվի: ԱԺ-ում լրագրողների հետ ճեպազրույցում այս կարծիքը հայտնեվ «Քաղաքացիական պայմանագիր» խմբակցության պատգամավոր, ԱԺ Պետաիրավական հարցերի մշտական հանձնաժողովի նախագահ Վլադիմիր Վարդանյանը։
«Չի կարող որևիցե պատգամավորի կամ փոքրամասնության վարքագծի պատճառով խորհրդարանի բնականոն գործունեությունը խաթարվել։ Դա լավագույն լուծումը չէ, դա լուծում է, որը որոշակի առումով համահունչ չէ ժողովրդավարական զարգացումներին, բայց դրան ոչինչ չպետք է հետևի։ Պատկերացրեց, օրինակ՝ փոքրաթիվ խմբակցությունը դուրս է գալիս ԱԺ-ից, և սա հանգեցնում է խորհրդարանի լուծարմանը կամ արձակմանը։ Սա նշանակում է, որ անընդհատ կարող ենք ունենալ պերմանենտ ճգնաժամեր, որոնք որևիցե կերպով չեն համապատասխանում խորհրդարանական կառավարման մոդելի առանձնահատկություններին»,-նշեց Վարդանյանը։
Պատգամավորի խոսքով՝ Ազգային ժողովի դահլիճը ընդդիմության հետ երկխոսության դահլիճն է։
«Խորհրդարանական քննարկումների համար նախատեսված դահլիճները ստեղծվել են երկխոսություն ծավալելու համար։ Սա է այն տեղը, որտեղ կարելի է ծավալել երկխոսություն»,- նշեց իշխանական պատգամավորը։
Նա նաև հավելեց, որ Նիկոլ Փաշինյանի պաշտոնանկության վերաբերյալ ընդդիմության օրակարգը մտացածին է. «Ես չեմ մտածում, թե նման հարց ընդհանրապես պետք է քննարկվի»:
Մանրամասները՝ տեսանյութում:
