07.10.2026 | 23:48
Արթուր Դանիելյանը կալանավորվեց
Վլադիմիր Պուտինը մայիսի 9-ին կարող է պաշտոնապես պատերազմ հայտարարել Ուկրաինային․ CNN
Քաղաքականություն
03.05.2022 | 11:45
Ամերիկացի և արևմտյան պաշտոնյաների կարծիքով, Ռուսաստանի նախագահ Վլադիմիր Պուտինը կարող է պաշտոնապես պատերազմ հայտարարել Ուկրաինային մայիսի 9-ին, ինչը թույլ կտա նրան լիարժեք մոբիլիզացնել Ռուսաստանի պահեստային ուժերը, քանի որ ՌԴ-ն փորձում է նվաճել արևելյան և հարավային Ուկրաինան, գրում է CNN-ը:
Արևմտյան պաշտոնյաները հավատում են, որ Պուտինը կօգտագործի այդ օրվա խորհրդանշական նշանակությունը և քարոզչական արժեքը՝ հայտարարելու Ուկրաինայում ռազմական ձեռքբերումների կա՛մ ռազմական գործողությունների էսկալացիայի մասին, կա՛մ երկուսն էլ:
Հիշեցնենք, որ մինչ օրս ռուս պաշտոնյաները պնդում են, որ հակամարտությունը միայն «հատուկ ռազմական գործողություն» է, որի հիմնական նպատակը «ապազգայնացումն» է:
«Կարծում եմ, որ նա կփորձի հեռանալ իր «հատուկ գործողությունից»: Նա հիմք է ստեղծում, որպեսզի կարողանա ասել՝ «տեսեք, սա այժմ պատերազմ է նացիստների դեմ, և ինձ ավելի շատ մարդ է պետք»», – LBC ռադիոյին ասել է Մեծ Բրիտանիայի պաշտպանության նախարար Բեն Ուոլեսը:
CNN-ը նշում է, որ մայիսի 9-ին պատերազմի պաշտոնական հայտարարումը կարող է ոգեշնչել Ռուսաստանի քաղաքացիներին և փոխել ներխուժման վերաբերյալ հանրային կարծիքը: Պատերազմ հայտարարելը Պուտինին թույլ կտա մոբիլիզացնել պահեստային ուժերը և զորակոչ իրականացնել: Արևմտյան և ուկրաինացի պաշտոնյաները հաշվարկել են, որ առնվազն 10,000 ռուս զինվոր է զոհվել ռազմական գործողությունների ընթացքում:
Մայիսի 9-ի վերաբերյալ երկրորդ սցենարը ներառում է Ուկրաինայի արևելքում գտնվող Լուգանսկի և Դոնեցկի տարածքների բռնակցումը, հարավում Օդեսայի համար մեծ ճնշում գործադրելը կամ հարավային նավահանգստային Մարիուպոլ քաղաքի նկատմամբ ամբողջական վերահսկողության հռչակումը:
ԱՄՆ-ն ունի «խիստ արժանահավատ» հետախուզական տվյալներ այն մասին, որ Ռուսաստանը «մայիսի կեսերին» կփորձի բռնակցել Լուգանսկը և Դոնեցկը, երկուշաբթի ասել է ԵԱՀԿ-ում ԱՄՆ դեսպան Մայքլ Քարփենթերը։ Կան նաև նշաններ, որ Ռուսաստանը կարող է ծրագրել «ժողովրդական հանրապետություն» հռչակել հարավարևելյան Խերսոն քաղաքում:
