Կինը ծննդաբերել է միայնակ․ ո՞վ է պտղի կորստի մեղավորը․ ՏԵՍԱՆՅՈՒԹ

Հրազդանի ԲԿ-ում երիտասարդ կինը ծննդաբերել է հիվանդասենյակում, միայնակ։ Պտուղը մահացած է ծնվել։ Ինչո՞ւ կամ ո՞ւմ մեղքով 20 շաբաթական հղիությունը ընդհատվեց․ այս հարցերը երկու օր է՝ տանջում է երիտասարդ զույգին։

33-ամյա կնոջը գիշերով ծննդատուն է հասցրել հայրը, քանի որ պտղաջրերի հոսք է նկատվել։ Հերթապահ բժիշկը, ըստ կնոջ, առաջին բուժօգնություն չի ցուցաբերել, քանի որ կոնֆլիկտ է ունեցել իր հղիությունը վարող բժշկի հետ։

Կինը տուն չի գնացել, բուժքույրերն էլ խորհուրդ չեն տվել ու նրան տեղավորել են հիվանդասենյակներից մեկում, որտեղ էլ առավոտյան 7․30-ին սկսվել է ծննդաբերությունը։

Նախորդ հղիությունների դեպքում ևս կնոջ մոտ պտղաջրերի վաղ հոսք եղել է, բայց դեղորայքային բուժման միջոցով կարողացել են պահպանել հղիությունն ու առողջ երեխաներ են ծնվել։

Այս հղիության ընթացքում բժշկին վերջին այցելությունը եղել է 1 ամիս առաջ՝ ապրիլի 1-ին։ Ամեն ինչ կարգին է եղել, այդ ժամանակ որևէ խնդիր չի արձանագրվել։ Մայրը դրանից հետո գրիպով է վարակվել, ինչը հղիության սկզբնական շրջանում կարող է վատ անդրադառնալ պտղի վրա։ Եթե պատշաճ բուժօգնություն ցուցաբերվեր, գուցե այլ ելք լիներ՝ ասում են հարազատները։

Ինչ վերաբերում է հերթապահ բժիշկ Տաթևիկ Հովհաննիսյանի և հղիությունը վարող բժիշկ Մարինե Ներսիսյանի միջև առկա կոնֆլիկտին, ծննդատան կոնսուլտացիայի բաժնի վարիչ Նարինե Պապյանն ասաց՝ տեղյակ չի եղել։

Տաթևիկ Հովհաննիսյանը Երևանի 2 այլ՝ հայտնի հիվանդանոցներում էլ է աշխատում։ Նարինե Պապյանի խոսքով՝ լավ մասնագետ է, նախկինում նրա մասին այցելուներից որևէ դժգոհություն չեն լսել, իրենք էլ են շոկի մեջ։

Այնուամենայնիվ, թե ինչի հետևանքով է պտուղը մահացել, խեղդվել է պտղաջրերի արտահոսքի հետևանքո՞վ, թե՞ մահացել է մոր տարած վիրուսի պատճառով, դժվար է ասել։ Բանն այն է, որ հայաստանյան օրենսդրությունը մինչև 22 շաբաթական պտղի մահվան դեպքում դիահերձում չի նախատեսում։

Մանկաբարձ-գինեկոլոգ Տաթևիկ Հովհաննիսյանը մեր նկարահանման պահին արդեն հիվանդանոցում չէր, հերթափոխը հանձնել ու գնացել էր, նրա հետ փորձեցինք կապ հաստատել հեռախոսով։ Մեր հարցերին, սակայն, պատասխանել չցանկացավ։

Առողջապահության նախարարությունից մեզ տեղեկացրեցին, որ դեպքին ծանոթ են, հավաքագրում են գործի հետ առնչվող փաստերը՝ դեպքն ուսումնասիրելու համար, որի արդյունքում միայն կկայացվի որոշում։

Մանրամասները՝ տեսանյութում։

Սաթենիկ Հայրապետյան