05.08.2026 | 15:51
Սարգիս Սահակյանից հօգուտ պետության կբռնագանձվի շուրջ 184 միլիոն դրամ և անշարժ գույք. Դատախազություն
Քաջարանի համայնքապետ Մանվել Փարամազյանն ազատ կարձակվի 50 միլիոն գրավի դիմաց
Հասարակություն
02.05.2022 | 18:46
Սյունիքի մարզի ընդհանուր իրավասության դատարանի դատավոր Լուսինե Սեփխանյանի որոշմամբ՝ Քաջարան համայնքի ղեկավար Մանվել Փարամազյանի նկատմամբ ընտրված խափանման միջոց կալանքը փոփոխվեց. նա ազատ կարձակվի 50 միլիոն ՀՀ դրամ գրավի դիմաց։ Այս մասին հայտնում է փաստաբան Երվանդ Վարոսյանը։
Մանվել Փարամազյանի խափանման միջոցն առաջին անգամ փոխվել էր դեկտեմբերի 17-ին, երբ Սյունիքի մարզի ընդհանուր իրավասության դատարանը՝ դատավոր Բորիս Բախշիյանի նախագահությամբ, որոշում էր կայացրել փոխել համայնքապետի խափանման միջոց կալանքը՝ 70 միլիոն դրամ գրավ սահմանելով։ Փարամազյանն ազատ էր արձակվել, սակայն երկու ամիս չանցած՝ փետրվարի 7-ին, Վերաքննիչ քրեական դատարանը որոշում էր կայացրել բավարարել Գլխավոր դատախազության ներկայացրած բողոքն ու կրկին կալանավորել Քաջարանի համայնքապետ Մանվել Փարամազյանին։
Հիշեցնենք՝ Մանվել Փարամազյանին մեղադրանք է առաջադրվել այն բանի համար, որ նա, 2016 թվականի նոյեմբերի 18-ից ստանձնելով Քաջարան քաղաքային համայնքի ղեկավարի պաշտոնը, ցուցումներով, խոչընդոտները վերացնելու, հանցավոր ճանապարհով ձեռք բերված գույքը պարտակելու եղանակներով Արմեն Ռոբերտի Անդրեասյանին օժանդակել է հափշտակել Հայաստանի Հանրապետության Քաջարան համայնքի Լեռնագործների 18 հասցեում գրանցված մոլիբդենային, պղնձի և այլ գունավոր մետաղների արդյունահանմամբ ու հարստացմամբ զբաղվող «Զանգեզուրի պղնձամոլիբդենային կոմբինատ» ՓԲ ընկերության առանձնապես խոշոր չափերի՝ շուրջ 65,403,333 դրամի գույքը:
Ըստ մեղադրանքի՝ Փարամազյանը մյուս մեղադրյալներ Նվեր Մկրտչյանի և Վազգեն Ազարյանի օժանդակությամբ ստացել է առանձնապես խոշոր չափի կաշառք:
Ռոզա Վարդանյան
