08.10.2026 | 19:13
ԱՄՆ-ը «երբեք թույլ չէր տա» Հունաստան-Թուրքիա հակամարտություն․ Ռուբիոն նշել է F-35-ների Անկարային փոխանցման պայմանը
Օպերատորի նկատմամբ բռնության դեպքով Դատախազությունում ուսումնասիրություն է իրականացվում
Հասարակություն
02.05.2022 | 13:20
Բաղրամյան պողոտայի և Պռոշյան փողոցի խաչմերուկում այսօր միջադեպ է տեղի ունեցել Պետական պահպանության ծառայության պետ Սարգիս Հովհաննիսյանի, ոստիկանական աշխատակիցների և ԶԼՄ ներկայացուցիչների մասնակցությամբ։ Միջադեպի տեսագրությունում երևում է, որ Հովհաննիսյանը սկզբում ոտքով հարվածում է օպերատորին, որը նկարահանում էր իրեն, ապա ձեռքով հրում լրատվամիջոցի միկրոֆոնը՝ ասելով, որ հեռախոսով է խոսում: Ավելի ուշ նրան ուղեկցողներից մեկը հրում է օպերատորին, ինչից հետո քաշքշում և ոտքով հարվածում:
Հարցին, թե ինչո՞ւ եք հարվածում, Սարգիս Հովհաննիսյանը պատասխանում է. «Իրավունք ունի, ասում ա՝ մի նկարի, խոսում եմ»:
Դեպքի առթիվ հրապարակված տեսանյութերն այս պահին ուսումնասիրվում են Գլխավոր դատախազության կողմից։ Ինչպես Factor.am-ի հետ զրույցում տեղեկացրեց Գլխավոր դատախազի խորհրդական Գոռ Աբրահամյանը՝ դեպքի մասով հանցագործության մասին հաղորդում են ստացել նաև «Իրազեկ քաղաքացիներ» ՀԿ ղեկավար Դանիել Իոաննիսյանից։
Հիշեցնենք՝ երեկ հրավիրված հանրահավաքի ժամանակ՝ «Հայաստան» խմբակցության պատգամավոր Իշխան Սաղաթելյանը հայտարարեց, որ այլևս տուն չեն գնալու և գիշերելու են Ֆրանսիայի հրապարակում։ Սաղաթելյանը հորդորեց քաղաքացիներին վաղ առավոտից գործադուլ և դասադուլ իրականացնել, իսկ անհնազանդության ակցիաները շարունակել քաղաքի բոլոր փողոցներում՝ փակելով հատկապես Կենտրոնի տարածքը։
Ռոզա Վարդանյան
