Իշխան Սաղաթելյանը` Քոչարյանի և Սերժ Սարգսյանի իշխանության տարիների թալանը հետ բերելու մասին. ՏԵՍԱՆՅՈՒԹ

Ընդդիմությունը շարունակում է  բողոքի ակցիաները։

«Նիկոլ Փաշինյանը հրաժարական է տալու: Նոր կառավարության կազմ է ձևավորվելու, որը հրաժարվելու է այն քաղաքական գծից, որն իրականացվում է այսօր»,- այս մասին Factor.am-ի հետ ճեպազրույցում հույս հայտնեց ՀՀ ԱԺ ընդդիմադիր փոխնախագահ Իշխան Սաղաթելյանը:

Մեկնաբանելով բողոքի ակցիաներից մեկի ժամանակ արված այն հայտարարությունը, թե իրականացնելու են գործող իշխանությունների տված ու չիրականացված խոստումը և վերադարձնելու են ժողովրդից թալանվածը, Սաղաթելյանը նշեց. «Եվ վերջին չորս տարիներին և դրանից առաջ երկրից թալանածը հետ ենք բերելու: Մենք առաջնորդվելու ենք օրենքով, այլ ոչ թե մարդկանց հետապնդելու ենք իրենց քաղաքական հայացքների համար: Իրենք ժողովրդին խոստացել են՝ թալանը հետ ենք բերելու, տանք ձեզ, բայց թալանը հետ չեն բերել, այդ մարդկանց հետ պայմանավորվածությունների են գնացել, և իրենց շուրջ ստեղծվել են նոր կլաններ: Սա մեզ համար անընդունելի է և պետք է բացառվի»:

Հարցին, թե արդյոք խոսքը վերաբերում է նաև Ռոբերտ Քոչարյանի և Սերժ Սարգսյանի պաշտոնավարման տարիներին, Սաղաթելյանը պատասխանեց. «Բոլոր տարիներին մեր պետությունից գողացվածը, եթե կան դրա պացույցները և օրենքով ահմանված հնարավորությունները, այո, պետք է վերադարձվի: Բայց ինչ-որ պահի պետք է գիծ քաշենք, Փաշինյանի գնալով՝ մենք միասնականություն ենք ունենալու»:

Դիտարկմանը, որ փաստորեն ընդունում է, որ ՀՅԴ-ի ու ՀՀԿ-ի կոալիցիոն  իշխանության ժամանակ թալան է եղել, Սաղաթելյանն արձագանքեց.  «Երկիր ենք կորցնում, դուք թալանի՞ց եք խոսում… Նիկոլից այն կողմ թալանչի չկա ու չի լինի»:

Մանրամասները՝տեսանյութում։