Քաղաքականություն
29.04.2022 | 12:53
Հայաստանի և Ադրբեջանի բարձրաստիճան պաշտոնյաների հերթական հանդիպումը նախատեսվում է անցկացնել մայիսին Բրյուսելում։ Այս մասին հայտարարել է Ադրբեջանի նախագահ Իլհամ Ալիևը «Հարավային Կովկաս․ զարգացում և համագործակցություն» միջազգային համաժողովի մասնակիցների հետ հանդիպմանը, գրում են տեղական լրատվամիջոցները։
Ալիևն ընդգծել է ԵՄ-ի, մասնավորապես, Եվրոպական խորհրդի նախագահ Շառլ Միշելի ակտիվ դերակատարումը Հայաստանի և Ադրբեջանի հարաբերությունների կարգավորման գործում՝ հիշեցնելով, որ ԵՄ նախաձեռնությամբ արդեն երկու հանդիպում է տեղի ունեցել։
«Մենք նաև հեռախոսային բանակցություններ ենք անցկացնում։ Կան ծրագրեր՝ կրկին Բրյուսելում մայիսի սկզբին անցկացնել Հայաստանի և Ադրբեջանի ներկայացուցիչների հանդիպումը»,- ասել է Ալիևը՝ հավելելով․ «Մենք ԵՄ-ին համարում ենք ազնիվ միջնորդ և ողջունում ենք նրանց ջանքերը։ Եթե հիմա Մինսկի խումբը չի գործում, կարծում ենք, որ ԵՄ կարող է իր դերակատարումն ունենալ կարգավորման գործընթացում»։
Ադրբեջանի նախագահը կրկին խանդով է խոսել ԵՄ-ի կողմից Հայաստանին հատկացվելիք ֆինանսական օգնության մասին՝ հույս հայտնելով, որ Բաքուն ևս կստանա նույն ծավալով և նույն պայմաններին համապատասխան ֆինանսական օգնություն։
Հիշեցնենք, որ մարտի 30-ին Բրյուսելում տեղի էր ունեցել ՀՀ Անվտանգության խորհրդի քարտուղար Արմեն Գրիգորյանի հանդիպումը Ալիևի օգնական Հիքմեթ Հաջիևի հետ։ Ապրիլի 6-ին էլ Բրյուսելում անցկացվեց ՀՀ վարչապետի, ԵՄ Խորհրդի ղեկավարի և Ադրբեջանի նախագահի հանդիպումը։
Էմմա Չոբանյան
