802 քրգործ՝ Փաշինյանին և այլ պաշտոնյաների վիրավորելու համար. Դատախազությունը տվյալներ է հրապարակել․ ՏԵՍԱՆՅՈՒԹ

Գործող իշխանությունների կողմից քրեականացված «ծանր վիրավորանքի» հոդվածով անցած ութ ամսում հարուցվել է 802 քրեական գործ։ Թեև Գլխավոր դատախազությունը շեշտում է, որ հարուցված քրեական գործերից ընդամենը 2-ի դեպքում է առերևույթ ծանր վիրավորանք հասցնելը վերագրվել լրագրողի, 38-ի դեպքում՝ քաղաքական գործունեությամբ զբաղվող անձանց և 762-ի դեպքում՝ այլ անձանց, այնուամենայնիվ, մինչ օրս դատարան հասած գրեթե բոլոր գործերը մեկ մարդու՝ վարչապետ Նիկոլ Փաշինյանին վիրավորելու դեպքերով են։

Քրեական գործերից 621-ը, այսինքն շուրջ 77.5%-ը հարուցվել է ուղիղ հայհոյանք հնչեցնելու, իսկ 181-ը կամ ընդամենը 22.5%-ը այլ ծայահեղ անպարկեշտ արտահայտություններով ծանր վիրավորանք հասցնելու փաստերով:

«Քննված կամ քննվող գործերով մեղադրանք է առաջադրվել ընդհանուր 160 անձի, որոնցից 131-ին՝ ուղիղ հայհոյանք հնչեցնելու, 29-ին՝ այլ ծայրահեղ անպարկեշտ որակումներ և արտահայտություններ անելու համար: Ընդ որում՝ որպես մեղադրյալ ներգրավված անձանց թվում չկան լրագրողներ, պաշտոնատար անձինք, 26-ի դեպքում մեղադրյալի կարգավիճակ ունեն քաղաքական ուժերին հարող, համակիր անձինք, իսկ մնացած դեպքերում՝ այլ անձինք: 108 անձի վերաբերյալ կայացվել է քրեական հետապնդումը դադարեցնելու կամ քրեական հետապնդում չիրականացնելու մասին որոշում»։

Գերատեսչությունը շեշտում է՝ որպես մեղադրյալ ներգրավված անձանց թվում չկան լրագրողներ, պաշտոնատար անձինք, 26-ի դեպքում մեղադրյալի կարգավիճակ ունեն քաղաքական ուժերին հարող, համակիր անձինք, իսկ մնացած դեպքերում՝ այլ անձինք:

2022թ. ապրիլի 1-ի դրությամբ՝ մեղադրական եզրակացությամբ դատարան է ուղարկվել 51 անձի վերաբերյալ 48 քրեական գործ, 6 անձի վերաբերյալ 6 քրեական գործով կայացվել են մեղադրական դատավճիռներ, իսկ մյուս գործերով դատական քննությունը շարունակվում է:

Աղմկահարույց հոդվածով առաջին դատավճիռը կայացվեց փետրվարին։ Ըստ քրգործի՝ քաղաքացին զանգահարել էր ՀՀ ոստիկանություն և աշխատակցի հետ ունեցած հեռախոսազրույցի ընթացքում Երևան քաղաքի երթուղային տրանսպորտի բնականոն գործունեությունը պատշաճ չկազմակերպելու պատճառաբանությամբ, ՀՀ վարչապետ Նիկոլ Փաշինյանի և այդ ժամանակ ՀՀ բարձր տեխնոլոգիական արդյունաբերության նախարարի պաշտոնը զբաղեցնող Վահագն Խաչատուրյանի հանրային գործունեությամբ պայմանավորված, սեռական բնույթի հայհոյանքներ հնչեցրել նրանց ու նրանց ընտանիքների անդամների հասցեին։ Տղամարդը մեղավոր ճանաչվեց և դատապարտվեց տուգանքի՝ նվազագույն աշխատավարձի հինգհարյուրապատիկի՝ հինգ հարյուր հազար ՀՀ դրամի չափով։

Իրավապաշտպանների դիտարկմամբ՝ սա աբսուրդ է։ Դեռ օրենքի նախագծի փուլում քաղհասարակությունը շեշտում էր՝  օրենքը որպես գործիք է օգտագործվելու իշխանությանը քննադատներին լռեցնելու համար։

Մանրամասները՝ տեսանյութում։

Ռոզա Վարդանյան