14.05.2026 | 23:29
Թուրքիայի և Վրաստանի քաղաքացիները 2025 թվականին ԵՄ-ից արտաքսումների թվով առաջին ու երկրորդ տեղերում են
«Ցեղասպանություն» եզրույթի օգտագործումը հիմնված է պատմական արձանագրումների վրա․ ԱՄՆ Պետքարտուղարություն
Քաղաքականություն
27.04.2022 | 19:55
Թուրքական TRT Haber-ը հարցում է ուղարկել ԱՄՆ Պետքարտուղարություն՝ պարզաբանում խնդրելով, թե «ինչո՞ւ է նախագահ Ջո Բայդենն ապրիլի 24-ի իր ուղերձում 1915-ի իրադարձությունները Հայոց ցեղասպանություն անվանում»։
Որպես «ցեղասպանություն» եզրույթի օգտագործման հիմնավորում՝ նշվում է ԱՄՆ Պետքարտուղարության այն ժամանակվա աշխատակիցների զեկույցները։
«Նախագահ Բայդենի կողմից «ցեղասպանություն» եզրույթի օգտագործումը հիմնված է պատմական արձանագրումների վրա, որոնք պատրաստվել են այն ժամանակ Օսմանյան կայսրությունում ծառայող ԱՄՆ Պետքարտուղարության անձնակազմի զեկույցների հիման վրա, և դրանք համապատասխանում են ժամանակակից հետազոտություններին»,- ասվում է Պետքարտուղարության պատասխանում։
Բացի այդ, դրանում նշվում է, որ Օսմանյան կայսրությունում 1915 թվականին հայերի հետ տեղի ունեցածը համապատասխանում է 1948-ին ընդունված Ցեղասպանության կոնվենցիայի սահմանմանը, սակայն 1951 թվականին ուժի մեջ մտած Ցեղասպանության մասին կոնվենցիայի պարտավորությունները չեն կարող հետադարձ կիրառվել, քանի որ իրադարձությունների կատարման ժամանակ ցեղասպանություն եզրույթը չի օգտագործվել։
Հավելենք, որ ապրիլի 24-ի իր ուղերձում ԱՄՆ նախագահ Ջո Բայդենը կրկին օգտագործել էր «Հայոց ցեղասպանություն» եզրույցը՝ հարուցելով Թուրքիայի իշխանությունների զայրույթը։
Էմմա Չոբանյան
