12.03.2026 | 23:35
Վթար Երասխ-Երևան ավտոճանապարհին․ կան տուժածներ
Զարգացած երկրներում ևս անասնաբույժի պակաս կա․ նոր նախագծով անասնաբուժությունը գրավիչ կդառնա
Տնտեսություն
26.04.2022 | 13:09
Հայաստանում անասնաբուժության ոլորտում մասնագետների պակասի լուրջ խնդիրներ կան, երիտասարդները չեն ցանկանում սովորել ու անասնաբույժ դառնալ։
Անասնաբույժների միջազգային օրվան ընդառաջ ՀՀ Էկոնոմիկայի նախարարի տեղակալ Տիգրան Գաբրիելյանը և Սննդամթերիքի անվտանգության տեսչական մարմնի ղեկավար Գեորգի Ավետիսյանն այսօր հրավիրված «Անասնաբույժների միջազգային օր. Ոլորտի խնդիրները, սպասվող բարեփոխումներն ու ծրագրերը» թեմայով ասուլիսում անդրադարձան անասնաբուժության ոլորտում առկա խնդիրներին:
Տիգրան Գաբրիելյանի խոսքով՝ զարգացած երկրներում ևս անասնաբույժի պակաս կա:
Նա տեղեկացրեց, որ օրենքի փոփոխության նախագիծ է մշակվում, որով յուրաքանչյուր անասնաբույժ պետք է գործունեություն ծավալելու լիցենզիա ունենա։ Կարևոր է ոչ միայն լիցենզիան ստանալը, այլև պահելը, որի համար անասնաբույժները մշտապես պետք է հարստացնեն իրենց գիտելիքները։
Գաբրիելյանի խոսքով՝ օրենքի փոփոխությունից հետո կլինեն խստացումներ, և գյուղացիներն այլևս չեն կարող իրենց անասուններին ներարկումներ անել, դա պետք է պարտադիր անի անասնաբույժը։ Ու երբ մսամթերքի վաճառքի համար անասնաբույժը տեղեկանք տա, նա վստահ կլինի, որ կենդանին բոլոր պատվաստումներն ու բուժումները ստացել է։
«Քանի որ հակառակ պարագայում ոչ միայն անասնաբույժի աշխատանքն են նրա ձեռքից վերցնում, այլև դա վնասում է մարդկային առողջությանը, քանի որ երբեմն հակաբիոտիկներով հարուստ մսամթերքը հայտնվում է մեր սեղանին»,- նշեց Գաբրիելյանը՝ հավելելով նաև, որ նոր նախագծով անասնաբուժությունը գրավիչ մասնագիտություն կդառնա:
Մանրամասները՝ տեսանյութում:
