Ինչ են որոշել Փաշինյանն ու Պուտինը Արցախի և սահմանագծման հարցերով․ համատեղ հայտարարության կետերը․ ՏԵՍԱՆՅՈՒԹ

Մոսկվայում Փաշինյան-Պուտին երեկվա հանդիպման արդյունքում հրապարակվեց 30 կետից բաղկացած համատեղ հայտարարություն։

Դրա կարևոր կետերից մեկը վերաբերում է Հայաստանի և Ադրբեջանի միջև սահմանագծման և սահմանազատման աշխատանքներին. «Կողմերը պայմանավորվեցին, համաձայն 2021թ. նոյեմբերի 26-ի եռակողմ պայմանավորվածությունների, արագացնել հայ-ադրբեջանական սահմանի շրջանում սահմանազատման և անվտանգության հարցերով երկկողմ հանձնաժողովի ստեղծումը՝ Կողմերի հարցումով Ռուսաստանի Դաշնության խորհրդատվական աջակցությամբ»:

Իշխանական պատգամավոր Գագիկ Մելքոնյանը կարծում է՝ սահմանազատման գործընթացի մեկնարկն անգամ ուշացած է, քանի որ ադրբեջանական կողմն անընդհատ խանգարում է դրա կյանքի կոչմանը. «Բրյուսելում հանդիպման ժամանակ նույն խնդիրն է բարձրացվել։ Որքան շուտ սահմանագծենք, այնքան լավ բոլորիս համար։ Հուսով եմ՝ դա արագ կավարտվի, եթե Ադրբեջանը նորից չխանգարի»։

Ընդդիմադիր «Հայաստան» խմբակցության պատգամավոր Գեղամ Մանուկյանին լավատեսություն չի ներշնչում փաստաթղթի այդ դրույթը։

«Այն շտապողականությունը, հապճեպությունը, որ Ադրբեջանի կողմից կա, ՀՀ տարածքի մի մասի օկուպացրած լինելու պայմաններում խոսել սահմանազատման մասին՝ անհասկանալի է։ Փաշինյանն իր խոստումների մեջ խճճվել է։ Անհասկանալի է՝ ի՞նչ ձևով է այդ գործընթացը տեղի ունենալու»,- ասում է նա։

Փաստաթղթում առկա մեկ այլ կարևոր դրույթ առնչվում է ճանապարհների ապաշրջափակմանը և հարակից այլ հարցերի։

Մանրամասները՝ տեսանյութում։

Մերի Մարտիրոսյան