07.10.2026 | 23:19
Հայաստանը ՄԱԿ-ում ընդգծել է զարգացող երկրների համար միջազգային աջակցության և ֆինանսավորման կարևորությունը
Դատավորների հայտարարագրերն առավել խորը վերլուծության կենթարկվեն. նոր նախագիծ
Հասարակություն
20.04.2022 | 12:15
Կոռուպցիայի կանխարգելման հանձնաժողովն առաջարկում է երկարաձգել դատավորների հայտարարագրերի վերլուծման ժամկետը՝ մինչև 2023 թվականի հունիսի 30-ը:
Արդարադատության նախարարության կողմից առաջարկվող կարգավորումների համաձայն՝ վերլուծության կենթարկվեն դատավորների՝ մինչև 2021 թվականի դեկտեմբերի 31-ը ներկայացված պաշտոնեական պարտականությունները դադարեցնելու, ինչպես նաև 2021 թվականի տարեկան հայտարարագրերը:
Այս մասին Factor.am-ը տեղեկանում է իրավական ակտերի նախագծերի հրապարակման միասնական կայքից։
Նախագծի հիմնավորմամբ՝ «Կոռուպցիայի կանխարգելման հանձնաժողովի մասին» օրենքում փոփոխություններ և լրացումներ կատարելով՝ կապահովվի դատավորների հայտարարագրերի վերլուծությանն առնչվող ստուգման գործառույթների պատշաճ և արդյունավետ իրականացումը։
«Այսպիսով, հնարավոր կլինի ապահովել բավարար ժամանակի առկայություն՝ դատավորների ֆինանսական դրության մանրամասն ուսումնասիրություն կատարելու, առկա խնդիրները հավուր պատշաճի վեր հանելու նպատակով: Միաժամանակ, ծախսերի հայտարարագրերի առնչությամբ հարկ է նշել, որ մինչև առաջարկվող ժամկետի ավարտը վերլուծման ենթակա են «Հանրային ծառայության մասին» օրենքի ուժի մեջ մտնելուց՝ 2021 թվականի փետրվարի 17-ից հետո ծախսերի հայտարարագիր ներկայացրած դատավորների ծախսերի հայտարարագրերը»,- նշված է նախագծին կից հրապարակված հիմնավորման մեջ։ Նախագծի հանրային քննարկումը կշարունակվի մինչև մայիսի 3-ը։
Ռոզա Վարդանյան
