Քաղաքականություն
19.04.2022 | 13:50
ԱՄՆ Պետքարտուղարության մամուլի խոսնակ Նեդ Փրայսը նախօրեին տեղի ունեցած ճեպազրույցում կրկին անդրադարձել է Լեռնային Ղարաբաղի հակամարտությանը, Հայաստանի ու Ադրբեջանի հարաբերություններին։
Հավելենք, որ Փրայսին այս թեմայով հարցն ուղղվել է, ըստ երևույթին ադրբեջանական որևէ լրատվամիջոցի կողմից, քանի որ այն պարունակում է ադրբեջանական քարոզչական թեզեր և ապատեղեկատվություն, որոնք վերջերս էլ ակտիվորեն շրջանառվում են Բաքվի մամուլում։
Մասնավորապես, ԱՄՆ պետքարտուղարության խոսնակին հետևյալ հարցն է ուղղվել, թե, իբր, Ռուսաստանն ու Ֆրանսիան հեռացրել են իրենց համանախագահներին Մինսկի խմբից և ե՞րբ է ԱՄՆ-ն նույնը անելու: Եվ ընդհանրապես, ինչպիսի՞ն է լինելու Մինսկի խմբի ճակատագիրը։ Բացի այդ՝ ինչպե՞ս է Միացյալ Նահանգները նպաստելու Ադրբեջանի ու Հայաստանի միջև խաղաղության պայմանագրի կնքմանը։
«Պետքարտուղար Բլինքենը հնարավորություն է ունեցել մի քանի շաբաթ առաջ խոսելու Հայաստանի ու Ադրբեջանի ղեկավարների հետ։ Մենք հավատարիմ ենք մնում Հարավային Կովկասի տարածաշրջանի խաղաղ, ժողովրդավարական և բարգավաճ ապագան խթանելուն: Մենք կոչ ենք անում Հայաստանին ու Ադրբեջանին շարունակել ակտիվացնել իրենց դիվանագիտական ներգրավվածությունը ու օգտագործել գոյություն ունեցող մեխանիզմները ուղիղ ներգրավվածության ՝գտնելու Լեռնային Ղարաբաղի հակամարտության հետ կապված բոլոր հարցերի համապարփակ լուծումներ և կարգավորել հարաբերությունները համապարփակ խաղաղության պայմանագրի կնքման միջոցով»,-ասել է Փրայսը։
«Երբ խոսքը վերաբերվում մեր դերին, մենք պատրաստ ենք նպաստելու Հայաստանին ու Ադրբեջանին այդ ջանքերում, ներառյալ, որպես Մինսկի խմբի համանախագահ։ Եվ երբ մենք խոսում ենք գոյություն ունեցող մեխանիզմների մասին, իհարկե, ԵԱՀԿ Մինսկի խումբը դրա մի մասն է»։
Հիշեցնենք, որ այս օրերին տարածաշրջանում է ԵԱՀԿ Մինսկի խմբի ամերիկացի համանախագահ Էնդրյու Շոֆերը, որը նախօրեին Երևանում հանդիպել է ՀՀ վարչապետ Նիկոլ Փաշինյանին ու ԱԳ նախարար Արարատ Միրզոյանին։ ԵԱՀԿ Մինսկի խմբի ֆրանսիացի համանախագահ Բրիս Ռոքֆոյն էլ օրերս էր ժամանել Երևան։
Էմմա Չոբանյան
