16.01.2025 | 12:43
Գլենդելը վերադառնում է բնականոն գործունեության. քաղաքապետը մանրամասներ է հայտնում
Ատրճանակ և հրացան ձեռք բերելը կհեշտանա․ օրենքի նոր նախագծի հետքերով․ ՏԵՍԱՆՅՈՒԹ
Քաղաքականություն
18.04.2022 | 20:40
Հայաստանում զենք ձեռք բերելու և հաշվառելու գործընթացները կպարզեցվեն։ «Զենքի շրջանառության կարգավորման մասին» օրենքում փոփոխությունների նախագծի հեղինակն իշխանական պատգամավորներն են։
Ո՞ր զենքերի մասին է խոսքը՝ օրինագծի համահեղինակ Արմեն Խաչատրյանն է մանրամասնում. «Բոլոր տեսակների մասին է կարգավորումը. դա կլինի քաղաքացիական զենք, մարտական, սպորտային»։
Նախագծով առաջարկվում է սահմանել քաղաքացիական զենք ձեռք բերելու թույլտվության տարիքը՝ 21 տարեկան: Չեղարկվում է զենք ձեռք բերելու համար նախատեսված Որսորդների միության անդամ լինելու պարտադիր պահանջը։ Չեղարկվում է նաև ակոսափող հրազեն ձեռք բերելու համար 5 տարի ողորկափող հրազեն ունենալու պարտադիր պահանջը: Սահմանվում են զենք ձեռք բերելու պարտադիր քննական կարգի հիմքերը: Բացի այդ՝ չեղարկվում է փամփուշտների քանակի սահմանափակումը: Սահմանվում են հրաձգարանների չափանիշները:
Ո՞վ կարող է զենք ձեռք բերել․ պատգամավորը նշում է հիմնական չափանիշները. «Պիտի վստահենք քաղաքացիներին. 21 տարեկան անձը, որը ծառայել է բանակում, զենքի կրման կանոնները գիտի, կարող է ակոսափող զենք ձեռք բերել։ Պետք է նաև լիցենզավորված կազմակերպության դասընթացներն անցնի։ Սրանով զարգացման հեռանկար ենք ապահովում ռազմամարզական կազմակերպությունների համար»։
Զենք ձեռք բերելու կարևոր մեկ այլ չափանիշ էլ այն է, որ անձը հոգեպես հավասարակշիռ լինի, բացի այդ՝ ազատազրկված չլինի։
Մանրամասները՝ տեսանյութում։
Մերի Մարտիրոսյան
