07.10.2026 | 23:48
Արթուր Դանիելյանը կալանավորվեց
Լուռ բողոքի ակցիա Գյումրիում՝ Նիկոլ Փաշինյանի այցի ժամանակ
Քաղաքականություն
16.04.2022 | 13:05
Այսօր ՀՀ վարչապետ Նիկոլ Փաշինյանի այցին ընդառաջ «Ես համաձայն չեմ» շարժման մասնակիցները փակել էին Գյումրու կենտրոնական Սայաթ-Նովա փողոցը՝ իրենց անհամաձայնությունը հայտնելով օրվա իշխանությունների վարած քաղաքականությանը։ Ցուցարարները ձեռքերին պարզել էին՝ «Ես համաձայն չեմ» գրությամբ ժապավեններ։
Նրանք մասնավորապես դժգոհ էին, իրենց ձևակերպմամբ, հայ-թուրքական ոչ արժանապատիվ հարաբերություններից, Արցախի մասին հնչող հայտարարություններից։
Նրանց հսկում էին մեծ թվով ոստիկաններ։ Ցուցարարները ընդամենը 10 րոպե փակ պահեցին փողոցը, այնուհետ շնորհավորեցին իրենց հսկող ոստիկանների մասնագիտական տոնը՝ հորդորելով ծառայել միայն ի շահ Հայաստանի Հանրապետության։
«Ես համաձայն չեմ» շարժման ղեկավար Կարապետ Պողոսյանը մեզ հետ զրույցում նշեց, որ սա իրենց առաջին բողոքի ցույցն է, հետագայում բողոքի այլ ցույցեր կանցկացնեն։
Նրանց բողոքի ակցիան սկսվել էր Նիկոլ Փաշինյանի այցից մի քանի րոպե առաջ․ վարչապետն այդ ընթացքում պատրաստվում էր անցնել Սայաթ-Նովա կենտրոնական փողոցով ու այցելել մի քանի մետր հեռավորության վրա գտնվող ոստիկանության Կումայրի բաժին։
Նշենք, որ այսօր ոստիկանի մասնագիտական տոնը նշվում է Գյումրիում, հյուրընկալվել են կառավարության գրեթե բոլոր անդամները։
Արմիկ Մովսիսյան
